Bhilali Bible
भजन सहीता 62
भगवानुत मारु आसरु छे
दावुदेन मीसमर भजन; भजन-गावण्यान डाहला वाटे: गावण्या यदुतुनेन रेंगोन अनसारे गावजु।
छाचलीन मे हुगु हय्न भगवानुत मां मन लागाड़ीन रवो,
मेसेक भगवानुत मां छुटकारु जड़से।
भगवानुत मार वाटे सातायणेन चापर्यु ने छुटकारु छे,
चु मार वाटे आसरान कीलु छे।
हंय मे हागराये नी ढासो।
ए वेरी माणसे, तुहुंं आखा मेळीन एक माणसेक मारने करीन, कत्यार लग ताक मां रवसु?
मे ते लहळ्ळा भीतड़ान तसु छे, ने पड़तेली वाड़ेन तसु छे।
छाचलीन तुहुंं मेसेक राज-पाट सी, छेटे करनेन करला छे;
तुहुंं झुटी वातेन साहरे खुस रवे।
तुहुंं मुंहडे करीन ते संयबरकत आपे,
बाकुन मन मां सराप देय।
ए मारा मन, भगवान धड़े सी सुक-सांती हात कर,
काहाकी मारी आस तेरेत पर छे।
भगवानुत मार वाटे सातायणेन चापर्यु,
ने छुटकारु छे, चु मार वाटे आसरान कीलु छे।
अळी मे हागराये ढासो नी।
मारु छुटकारु ने ईज्जत भगवानुत छे;
मार वाटे चीकणलु चापर्यु,
ने आसरु भगवानुत छे।
ए माणसे, आखी टेमे भगवानुत पर भुरसु करु!
तीनाक आपसा मनेन आखी वात कय देवु।
भगवान आपणु आसरु छे।
छाचलीन, धुळान बंन्ला माणसे,
जलेमका नी टीके, ने मटला-नानला,
आखा माणसे लुच्चा छे;
चे आखा की आखा तुल मां दमेन वाहळी सी बी फवरा छे।
हापकीन लावला धन पर भुरसु मां करु,
लुटीन लावला धन पर मटाय मां करु,
भले माल-धन वदे,
तेबी तेरे पर मन, मां लागाड़ु।
भगवान एक कावा कयु; ने मे बेसका कावा असु बी सामळी रयु की,
ताकत वाळु ते भगवानुत छे।
ए मालीक, तारेन तसु दया देखाड़न्यु काहनु नी हय।
तु ते माणसे काजे तींद्रा कामेन साहरे ईनाम नीते डंड आपे।1
Source notes (1)
- Cross-reference अय्युब 34:11; यीरम्या 17:10; मत्ती 16:27; रोमीयो 2:6; उजेंता बुले 2:23
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.