Bhilali Bible
भजन सहीता 42
दुसरु भाग
छुटकारा वाटे दुवा
(भजन सहीता 42—72)
भजन-गावण्यान डाहला वाटे: कोरह अवल्यातेन एक मसकील भजन
जसी हरनी झीरेन पाणी पीणेन हर करे,
तसुत, ए भगवान, मे तारी हेर कर रयु।
मे भगवानेन, हव जीवत्ला भगवानेन हेर कर रयु,
मे कत्यार भगवानेन्चां हजुर हय्न उबु रय्स?
मे रात-दाहड़ु रड़ी-रड़ीन आफरी गुयु;
ने माणसे मेसेक
आखु दाहड़ु कवता रवे की,
तारु भगवान कां छे?
ईनी वातेक हेर करीन मारु जीव उहसास लेणे बाजी जाय की,
मे पेहले कसुक टुळा भेळतु जातलु; मे तींद्रे अगळ-अगळ जातलु,
मे जीतणेन गीते गावतु जातलु, ने भगवानेक बेसकु वारु कय्न गीत गावतु जातलु,
तीहवार वाळन्या माणसे भेळतु, भगवानेन मंदीर मां जाया करतेलु।
ए मारा जीव-आत्मा, तु काहा फीकुरेम पड़ रयु?
ने मारे मां मांही-ने-मांही काहा घाबराय रयु?
भगवान पर आस कर। मारु भगवान ते मेसेक छुड़ावणेवाळु छे।
अळी पछु मे भगवानेन मंदीरेम हजुर हय्स;
ने अळी पछु तीना भगवानेन गुण गाय्स।
मारु जीव-आत्मा ते मांहे की मांहे घाबराय रयु।
हेरेसी यरदन नदीन झीर वाळा देस मां सी,
हेरमोन बयड़ान चट्ये सी ने मीसगार बयड़ा पर सी,
मे तुसेक हेर कर्या करीस।
ने बयड़ाम वाळो पाणी,
दरीयान झेलकेन तसो घुगवी रयो;
मेसेक लागे की, तारा झलके अळ-अळीन आय्न मेसेक टुपीत लेदा।
सच, मे दीसु, भगवान आपसी ताकत ने दया देखाड़से;
ने राती मे तेरा गीत गाय्स,
ने मेसेक जीवाय आपण्या यहोवा भगवान धड़े दुवा करीस।
मारु भगवान ते मारे वाटे आडु आवण्यु चापर्यु छे;
मे तीनाक कय्स, “तु मेसेक काहा वीसरी गुयु?
मारा वेरी मेसेक वेला पाड़े,
करीन मे काहा रड़तु-कलपतु ने ढासतु फीर रयु?”
मारा वेरी मारी वातेन नावबद्दी करे,
ने असो लागे की, चे मारा हाटका भांजीन चुर-चुर कर देदा।
चे आखु दाहड़ु असात कह्या करे “तारु भगवान कां छे?”
ए मारा जीव, तु काहा फीकुरेम पड़ रयु?
ने मारे मां मांही-ने-मांही काहा घाबराय रयु?
भगवान पर आस कर। मारु भगवान ते मेसेक छुड़ावणेवाळु छे।
अळी पछु मे भगवानेन मंदीरेम हजुर हय्स;
ने अळी पछु तीना भगवानेन गुण गाय्स।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.