Bhilali Bible
भजन सहीता 41
मांदला माणसेन दुवा
दावुदेन लिखलो एक मीसमर भजन
जु गरीबेन मदत करे, चु बेसकु बरकतवाळु छे!
गरान टेमे, यहोवा भगवान तीनाक छुड़ावसे।
यहोवा भगवान तीना भलास्यान राखवाळी करीन तीनाक बचाड़से,
ने चु धरती पर रय्न बेसकु संयबरकत वाळु बणसे।
भगवान, तीनाक वेरीन हात मां नी करे।
जत्यार चु धरमी माणुस मांदु हय्न खाटला मां पड़ रवसे;
तत्यार यहोवा भगवान तेरी राखवाळी करसे भगवानुत, तीनाक वारु करीन गुदड़ाम सी उठाड़ीन वारु कर देसे।
मे ते कयु, “ए यहोवा भगवान, मारे पर दया कर;
मेसेक वारु कर, काहाकी मे तारे वीरुद पाप करलु छे!”
मारा वेरी असा कय्न मार पर कुहराये:
“हयु कत्यार मरसे, ने तेरो नाव की ईसरायसे?”
जे वेरी माणसे, मेसेक भेळा हवणे ते आवे,
ने ढंगड़ा करीन वात बी करे; बाकुन मन मां ते कुहराये,
ने बाहर जाय्न आखा अगळ मारी नाव-बद्दी करे।
मारा आखा वेरी, भेळा हय्न मार वीरुद मन-मनेन वात करे;
ने चे मारो नुकसाण करने करीन असा मुजगी करे।
“हीनाक ते रीस आवे असु रुग्टु लाग गुयु; हंय जु खाट्लाम पड़ रयु,
हंय हीनाक कदी पछो नी उठाये।”
मारु दुस्तीदार, तेरे पर मारु भुरसु हतलु,
जु मार साते बसीन मारु रुटु खात्लु,
चु हंय लातावणे बाजी गुयु।1
बाकुन ए यहोवा भगवान, तु मार पर दया करीन,
मेसेक वारु करीन उबु कर। काहाकी मे तींद्रे सी बदलु ली सको।
तत्यार मे मारा वेरीक जीत लीस,
ने जो जाणी लीस की, तु मार सी खुस छे।
ए भगवान! तु मारी खराय्न साहरे मारी राखवाळी करे।
ने तारी हजरी मां जलम मेसेक तारे पुठे रवणी दे।
नी-छेवाय टेम सी चु, नी-छेवाय टेम लग, यहोवा भगवान वारु छे;
जु ईस्रायली माणसेन भगवान छे। चु असुत छे,
आमीन! आमीन!
Source notes (1)
- Cross-reference मत्ती 26:23; मरकुस 14:18; लुका 22:21; युहन्ना 13:18
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.