Bhilali Bible
भजन सहीता 40
भगवानेन बड़ायन एक गीत
भजन गावण्यान डाहला वाटे दावुदेन भजन
मे दम धरीन यहोवा भगवानेन वाट देखीन दुवा करतु रयु;
ने चु मारी वीनती सामळीन मारी मदत कर्यु।
मे खुयाराम ने कीचड़ मां पड़ीन मरलु हतलु;
बाकुन भगवान मेसेक चां सी नीकाळीन बचाड़ लेदु।
ने मेसेक काठला ढाटा पर,
उबु करीन मेसेक काठु कर्यु।
चु मेसेक एक नवलो गीत गावणे सीकाड़लु छे,
आपणा भगवानेन बड़ायन गीत सीकाड़लु छे।
बेसका माणसे जो देखीन बीह जासे,
ने यहोवा भगवान पर भुरसु करसे।
बेसकु बरकतवाळु छे चु माणुस, जु यहोवा भगवान पर भुरसु करे,
ने मटाय करन्या
ने लुचाय करन्या भीणी मुंह्डो नी फेरवे।
ए यहोवा भगवान, ए मारा भगवान,
तु जे चकराड़न्या बेसका-काम हामरे वाटे करलु छे,
चे बेसका छे। ने जे वीच्यार तु हामरे वाटे करलु छे;
चे बेसका छे। तार बराबर काहनु नी हय। कदी मे तीनु आखा कामेन बारामां वात करो,
ती चे बेसका छे की, गीणाये लग नी।
तुसेक भाती-भातीन भेट ने बादा नी चाहजे।
हेरेसी आक्ठान-बादा ने पापेन बादा तु नी मांग्यु,
बाकुन तारी वात वारु सामळने करीन,
तु मारा कांटा उगाड़ देदु।
काहाकी ए भगवान! “देख मे आय लागलु छे;
जसो तार किताप मां मार बारामां लिखलो छे,
तसुत मे तारी मरजी पुरी करने तीयार छे।
ए मारा भगवान, तारा नेम-कायदा मारा मन मां बस रया।”
ए यहोवा भगवान, मे तारा माणसेन मटली बठक मां,
तारा धरमेन खुस-खबर सामळायु; तु ते जाणे की,
मे तारी वात कवतुत रयु; ने हुगु नी रयु।
ए भगवान! मे तारा धरमेन वात मारा मनेम सातीन नी मेक्यु;
मे तारी छाचाय्न ने तार साहरे जड़न्या छुटकारान वात करलु छे;
मे तारी दया ने परमेक,
ने छाचाय्क मटली बठक अगळ उजेंतु करलु छे।
ए यहोवा भगवान! मार पर दया कर; तार साहरे तारी दया
ने छाचाय्न साहरे मारी राखवाळी जलम हवती रवे।
मदत वाटे दुवा
(भजन सहीता 70)
काहाकी मे गीणाये नी अतरा बेसका दुख सी घेरवाय रयु;
ने गीणाये नी अतरा बेसका मारा पाप
मेसेक कसीन धर लेदा:
मेसेक देखायतो नी;
मारा पापे मारा मुणकान कान्या सी बी वदु छे,
हेरेसी मे हिम्मत हार गुयु।
ए यहोवा भगवान! दया करीन मेसेक बचाड़ ले; ए यहोवा भगवान! उतवाळुस मारी मदत कर।
जे मारु जीव लेणेन कर रया; चे लाजवाय जाणु चाहजे,
चे आखा काळा पड़ जाणु चाहजे।
जे मारो नुकसाण करनेन हर कर रया,
चे पछा ढास जाणु चाहजे, ने तींद्रु आखु अबरु जात रवणु चाहजे!
जे मेसेक अहोय लाला, कवे? कय्न मारी हासी उडाड़े; चे लाजवाय जाणु चाहजे,
ने चे चकराय्न अका-बका हंय जाणु चाहजे।
बाकुन ए भगवान! जतरा बी तुसेक हेरे;
चे आखा तार साहरे खुस हय्न गखळायणु चाहजे;
जे माणसे छुटकारा वाटे तारीत आस करता रवे;
चे जलम असात कवता रहणु चाहजे, “यहोवान बड़ाय हवे!”
मे ते नीचळु ने गरीब छे,
मालीक-भगवानेन नींगा मार पर पड़नु चाहजे;
ने तुत मेसेक छुड़ावण्यु ने मारी मदत करन्यु छे।
ए मारा भगवान! वार मां लागाड़े; मामार मारी मदत कर।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.