Bhilali Bible
भजन सहीता 39
एक दुखी माणसेन पसतावु
यदुतुन गावण्या डाहला दावुद वाटे भजन
मे मारा मनेम कयु, मेसेक गलत नी बुलायणु चाहजे,
करीन मे मारा बुलना-चालना काजे जाळवीस;
जत्यार लग पापी माणसे मार अगळ छे, मे हुटड़ा सी लीस।
मे जाणी बुजीन बुबड़ु बणीन हुगु हंय रयु;
ने भलाय्न वात कव्णो बी छुड़ देदु;
मारो दुख उलटो वदुस हंय गुयो।
सुची-सुचीन मारी छाती भराय गुय;
तत्यार मारु जीव नी थुब्यु,
ने मे जो कवणेत बाजी गुयु:
ए यहोवा भगवान! तु मेसेक जो देखाड़ की, मे कत्यार मरीस?
ने मारी उमर कतरी छे?
तेरेसी मे पाक्कु जाण लम की, मारी जीवाय ते बेसकी छाटी सरने वाळी छे।
ए भगवान! जी जीवाय तु मेसेक आप्यु, ची जीवाय बेसकी वारु छे;
ए भगवान! मारी उमर तारी नींगा मां बेसकी कमती छे।
छाचलीन माणुस कतरु बी ताकत वाळु हय, तेबी चु वाहळान तसु छे।
छाचलीन माणुस साहळान तसु चाले-फीरे:
छाचलीन माणुस असलुत घाबराये; चु धन भेळु ते करे,
बाकुन चु माणुस जो नी जाणे की, तीना धनेक कुण वापरसे।1
हंय ए भगवान-मालीक, मे तुसेक छुड़ीन कुणीन आस करो?
मे ते तारेत पर आस कर रयु।
मेसेक मारा आखा पापेम सी बचाड़ ले।
बे-अकल्या माणसेक मारी हासी घुण उड़ाड़नी देय।
ए भगवान! जो आखो काम तुत कराड़लु; हेरेसी मे तार अगळ बुबड़ा साय हुगु हंय रयु।
तु मारु मकेल्लु रुग मार पर सी छेटे कर;
काहाकी मे तीना रुग भारे बरबाद हवणे बाजी रयु।
जत्यार काहनु बी माणुस पाप कर देय, ती तु तीनाक लड़ी-लड़ीन सुदारे;
जसु कीड़ु पुथल्याक काटीन बीगाड़ देय,
छाचलीन माणुस वाहळीन तसो छे।
“ए यहोवा भगवान! मारी दुवा सामळ, ने मारी वीन्ती पर धीयान दे।
मारो रड़नु-कलेपणु सामळीन हुगु मां रवे! काहाकी मे तार अगळ दीसरा देसेन तसु हंय रयु,
ने मारा डाहा-डाहान तसु दीसरा-देसेम रय रयु।
ए भगवान, तु मार भीणी रीसवाय्न मां भाळे; मे मरीन ईनी कळीम सी जाणेन पेहेल,
अळी पछु खुस हवणे हींड रयु।”
Source notes (1)
- Cross-reference 1 कुरींथी 7:31; लुका 12:20
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.