Bhilali Bible
भजन सहीता 38
दुख मां पड़ला माणसेन दुवा
भगवानेक हेर करावण्यो दावुदेन मीसमर भजन।
ए यहोवा भगवान, तु मेसेक रीसवाय्न मां लड़े; ने कीचवाय्न मेसेक डंड मां आपे।
काहाकी पेहलुत तारा बीलखा मारे लाग रया;
ने मे तारा हाते तळे दड़पाय रयु।
ए भगवान, तारी रीसेन वज सी मे मांदु पड़ गुयु;
ने मारा पापेन वजे सी मारा डीलेम बी मेसेक छुटकारु नी हय।
काहाकी मे मारा पाप मां आखु डुब गुयलु;
ने मारा पाप मेसेक भारेन तसा दड़पी रया ने मेसेक सेण नी हवतो।
मे गांडायेत पाप कर्यु, हेरसी मारा घवे पड़ज्या;
ने चे घाव पाकीन सड़ने बाजी रया।
मे दुखेत मां ढंगु वळ गुयलु छे,
ने आखु दाहड़ु रड़तु-कलप्तु फीर्या करो।
काहाकी मारी कमर दुखणे बाजी रय;
ने मारा डील मां इतरीक बी चेन नी हय।
मे बेसकु लुलु हय्न घुळाय पड़्यु;
मे मारा मनेम घाबराय्न कासणे बाजी रयु।
ए मालीक-भगवान! मारी आखी हर तार अगळ छे;
ने मारो कासणु तारे अगळ सी सातायो नी।
मारी छातीम धुक-धुक करे; ने मारी ताकत खत्तम हंय गुय;
बाकुन मारा डुळा बी कमतीस देखे।
मारा घाव देखीन दुसतीदार,
ने मार साते रवण्या माणसे आडा भाळीन जात रया;
ने मारा सगा माणसे बी छेटेत जाय्न उभा हंय गुया।
जे वेरी मेसेक मारने कर रया,
चे जाळ आथरी रया; चे मारो नुकसाण करने कर रया,
ने मेसेक सारनेन वात करे; ने चे आखु दाहड़ु ताक मां रय्न मेसेक मारनेन मुजगी करे।
तेबी मे तींद्री वात पर मन नी लगाड़तु;
ने मे बेहरान तसु ने बुबड़ान तसु हंय रयु
मे तीना माणसेन तसु हंय रयु,
जु काय नी सामळे, ने हुंगरान तसु पछु बुले नी।
बाकुन ए यहोवा भगवान, मे तारीत आस करो; ए मारा भगवान! ए मालीक!
मे पाक्कु जाणो की, तु मेसेक जपाप आपसी।
काहाकी मे तारेत धड़े असी आस करो, “असो घुण हवणे देय की,
मे हीट पड़ो, ती चे वेरी माणसे मटाय करीन खुस हय्न गखळाये।”
काहाकी मे ते हंय पड़नेत वाळु छे;
ने मारो दुख जलम मार अगळुत रवे।
मे मारा पाप मान लम;
ने मे मारा पापेन वजे सी बेसकु दुखी छे।
मारा वेरी ते उतवाळ्या ने बेसका ताकतवाळा छे,
ने फालतुत मारी वीरुद करन्या झुटा माणसे बेसका हंय गुयला छे।
चे भलाय्न बदले कुहराय करे; तींद्री मे मदत कर्यु, चेत मारी वीरुद करे;
मे भलाय कर्या करो, तेबी मार पर जाळसांदी नाखे।
ए यहोवा भगवान! मेसेक छुड़ी मां देय;
ए मारा भगवान! मारेन्चां सी छेटु मां हवे।
ए मालीक भगवान! ए मेसेक छुड़वण्या भगवान! मारी मदत करने वाटे उतवाळ कर।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.