Bhilali Bible
भजन सहीता 37
कुहर्या ने भलास्या माणसेन बदलाव
दावुदेन भजन
कुहर्या माणसे पर मां रीसवाये,
जे गलत काम करे, तींद्रे पर जलन मां करे!
काहाकी चे गलत काम करन्या माणसे, नीळ्ळा चारान तसा चीमाय जासे,
ने चारान तसा छाटात सुक जासे।
यहोवा भगवान पर भुरसु कर, ने भलो काम कर; ने धरती पर वसलु रव,
ने छाचाय पर मन लागाड़्या कर।
यहोवा भगवानुत मां तुहुं खुस रवु,
ने चु तारी आखी वारलु हर पुरी करसे।
तु आपसी आखी जीवाय्न फीकुर, यहोवा भगवानेन सुपरुत कर दे;
ने तेरे पर भुरसु कर; हयुत तार वाटे आखो कांय पुरो करसे।
भगवानुत तारा धरमेन काम, वीजाळान तसु उजेंता कर देसे; ने तारु नीयाव मांझणीन दाहड़ेन वीजाळान तसु चुखोझण देखाड़से।
यहोवा भगवान अगळ हुगु रव; ने गम खाय्न तेरीत वाट देख:
तीनु माणसे पर मां कीचवाये, तींद्रा वारलु दाहड़ा आय रया,
ने जे कुहराय करने करीन मुजगी कर्या करे।
रीस करनु छुड़ दे ने खीजवाये घुण! तु कीचवाये मां,
काहाकी कीचवाये ती, कुहराय्त पयदा हवे।
हेर राख, कुहर्या माणसे सर जासे;
बाकुन जे, यहोवा भगवानेन वाट देखे, चेत धरतीन हकदार्या बणसे।
हंय इतरीक वार मां कुहर्यु माणुस रवे नी;
ने तु तीनाक तेरा ठीकाणा पर हेरसी बाकुन चु, चां नी जड़े।
बाकुन नीचळा माणसे धरतीन हकदार्या बणसे,
ने सुकुन सी जीवीन खुस हय्न गखळायसे।1
वेरी माणसे, धरमीन वीरुद मां मुजगी करे,
ने तींद्रे पर दात ककड़ावे।
बाकुन मालीक-भगवान वेरी पर हास्से, काहाकी तीनाक मालम छे की,
वेरीक एक दाहड़ु डंड जड़से।
कुहर्या माणसे, गरीब-गुरबाक ने सुद्ला माणसेक मारीन हेड़ पाड़ने करीन;
आपसा तलवार्या मीयान मां सी नीकाळ लेदला छे;
ने तीनुक बीलखी ताणने करीन, धंदली बी चड़ाय लेदला छे।
बाकुन कुहर्यान तलवार्या तींद्रीत छातीम भरायसे;
ने तींद्री धंदली भाग जासे।
धरमी माणसेन इतरोक माल-धन बी,
वेरीन बेसका माल-धन सी वारु छे।2
काहाकी, कुहर्या माणसेन ताकत भांजी देसे;
बाकुन यहोवा भगवान धरमी माणसेक समाळे।
यहोवा भगवान, खरला माणसेक दाहड़ीन समाळे,
ने तींद्री वाटु तींद्रे धड़े जलम रवसे।
खरला माणसे गरान टेमे नी लाजवाये; ने काळेन दाहड़ाम बी,
तींद्रे धड़े खाणान ने पाणीन काळ नी पड़े।
यहोवा भगवान, कुहराय करन्या माणसेक सार देसे,
ने यहोवा भगवानेन वेरी, चराय्न चारान तसा सुकीन सर जासे;
ने कुळ्ळान तसा अंछाप हय्न खत्तम हंय जासे।
कुहर्यु माणुस उधार ते मांगे, बाकुन तीनुक पछो नी आपे;
बाकुन धरमी माणुस दया करीन आपतुत रवे।
जे यहोवा भगवान धड़े सी बरकत हात करे, चे धरती पर हक जमाड़से।
बाकुन जे, भगवान धड़े सी गरा हात करे, चे सर जासे।
तीनी वाट्ये धरमी माणुस काजे चालनु चाहजे, तीनीत वाट्ये तीनाक चालाड़ीन यहोवा भगवान खुस हवे;
ने तीनीत वाट्ये चालने करीन चु, तेरा पाय काठा बी करे।
भले धरमी माणुस झटवाय पड़से, तेबी नी पड़े;
काहाकी यहोवा भगवान तेरु हात धर रवे।
मे जुवान हतलु ने हंय डाहवु हंय गुयु,
बाकुन मे धरमी माणुस काजे आज लग भीकारी साय रुटा मांगते नी देख्यु;
ने तेरी अवल्यात काजे भीक मांगतेलु नी देख्यु।
धरमी माणुस आखु दाहड़ु दया करीन उधार आप्यात करे,
ने तेरी अवल्यात बी संयबरकत हात करीन दीसरान बी भलो करती जाय।
कुहराय छुड़ीन पछु वळ जां ने भलाय कर;
ती तु धरती पर टेकीन रवसी।
यहोवा भगवान धरम पाळन्या पर खुस रवे;
ने चु, आपसा पर भुरसु करन्या माणसे काजे नी छुड़े;
ने तींद्री जलम राखवाळी करतु रवे,
बाकुन कुहर्या माणसेन अवल्यात काजे खत्तम कर देसे।
धरमी माणसे धरती पर हक जमाड़से;
ने चां चे जलम वसला रवसे।
धरमी माणसे मुंहडा सी वारु अकलेन वात करे;
ने चु नीयावेन वात करे।
तेरा मन मां भगवानेन कायदा रवे;
हेरेसी चु कदी खीसलीन नी पड़े।3
कुहर्या माणसे, धरमी माणसेक मारने वाटे डुकाय्न बस रवे;
ने तीनाक मारनेन कुसीत कर्या करे।
यहोवा भगवान, धरमी माणसेक कुहर्यान हात मां नी करे;
ने जत्यार नीयाव हवसे, ती धरमी नी-गुनाळु नीकळसे।
यहोवा भगवानेन वाट देख ने तेरीत वाट पर चाल्या कर,
ती चु तुसेक बढ़ायन धरतीन हक आप देसे।
ने जत्यार भगवान कुहर्याक सारसे, ती तु तार डुळे देखसी।
जसो वड़ेन झाड़को उंगीन उंडा मुळे भरायन लांबो चोवड़ो मटो हवे;
तसुत मे हत्यारा वेरीन दाहड़ा वळतेला देखलु।
अळतेन जत्यार काहनुक तेरेन्चां माय्न गुयु, ती चु वेरी माणुस, चां नी हतलु; काहाकी चु सर गुयलु;
ने मे बी तीनाक हेर्यु, बाकुन चु मेसेक जड़्यु लग नी।
नी-गुनाळा माणसेक धीयान मां राख ने खरला माणसेक देख;
काहाकी भेळा रय्न जीवण्यान अवल्यातेन जलम वारुत हवसे।
बाकुन गुनाळा माणसे मरीन-सरी जासे;
ने वेरीन अवल्यात जलमकीत सर जासे।
धरमी माणसे काजे यहोवा भगवानुत छुटकारु आपे;
गरान टेमे चु तीनुक ताकत आपे।
ने यहोवा भगवान, धरमी माणसेन मदत करीन तीनुक बचाड़े;
चु तीनुक कुहर्या माणसेन हातेम सी छुड़ावीन बचाड़े;
काहाकी धरमी माणसे तेरुत आसरु लेय।
Source notes (3)
- Cross-reference मत्ती 5:5
- Cross-reference नीतीवचन 15:16
- Cross-reference वेवस्थावीवरन 6:6; यीरम्या 31:33
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.