Bhilali Bible
भजन सहीता 36
माणसेन कुहराय
भजन-गावण्यान डाहला वाटे: यहोवा भगवानेन चाकर्या दावुदेन भजन
कुहर्या माणसेन कुहराय्न बारामां, मारो मन असो कवे,
तींद्रा मनो मां भगवानेन धाक, ने बीहाणो नी हय।
काहाकी कुहर्यु आपसा मनो मां असु वीच्यार करे, “देख, मे बेसकु वारु छे”
हेरेसी चु आपसा पापेन बारामां अंजाण्यु रवे, ने तीनु पापेन वीच्यार करीन रीस करे पाखुर पाप करतुत रवे।
तीना कुहर्या धड़े कुहराय करनेन, ने धुकु देणेन वात छे;
चु अकलेन ने भलाय्न काम करनु छुड़ देदु।
कुहर्यु, गुदड़ाम पड़्यु-पड़्यु कुहराय्न वीच्यार कर्या करे;
चु कुहराय्न वात काजे मानीन एक-हेट्यु हंय रवे;
ने चु कुहराय काजे छुड़े नी।
भगवानेन दया
ए यहोवा भगवान, तारी दया बेसकी वारु छे;
ने तारी छाचाय सरगेन वादळाम लग पुग गुय।
ए भगवान! तारो धरम, मटला बयड़ान तसो टेकलो रवे।
ने तारा नीयाव, नी-छेव्या दरीया सी बी उंडा छे;
तुत माणसेन ने आखा जनवार्यान राखवाळी करे।
ए भगवान, तारी दया बेसकी महगी छे! जसा पीच्या, कुकड़ीन पाखड़ा तळे आय्न आसरु लेय,
तसात आखा माणसे तारेत आसरे जीवे!
आखा माणसे तारा घरेम सी, वारलु-वारलु खाणो खाय्न आफरी जाय;
ने तु ते तीनुक खुसीन नदीम सी पाणी पीणे करीन आपे।
काहाकी जीवाय्न झीर तारेत धड़े छे;
तारा वीजाळान साहरे हामु काजे वीजाळो जड़े।
जे माणसे तुसेक जाण लेदा, तींद्रे पर तु दया जलम करतु रव,
ने जे खरला माणसे छे, तींद्रे पर तारो धरमेन काम जलम देखाड़तु रव।
मटाय करन्या माणसे मेसेक लातावणु नी चाहजे,
ने जे वेरी छे चे जुर करीन मेसेक ढासाड़नु नी चाहजे।
चां कुहर्या माणसे, हीट पड़्या; चु तीनुक धकली देदु;
ने हंय तीनुक पछो कदी नी उठाये।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.