Bhilali Bible
भजन सहीता 35
वेरी माणसे सी बचाड़ने करीन दुवा
दावुदेन भजन
ए यहोवा भगवान! जे माणसे मार साते लड़ाय पड़े, तींद्रे साते तु बी लड़ाय कर;
जे मार साते लड़ाये; तींद्रे साते तु बी लड़ाय कर।
ए भगवान, ढाळ ने भालु लीन मारी मदत करने करीन उठ।
ने वेरी भीणी, भालु उमाणीन मार सुदु उबु हंय जां ने मार पछळ पड़न्याक रुक।
ए भगवान! “मेत तुसेक बचाड़न्यु भगवान छे”
कय्न मारी हिम्मत वदाड़।
जे, मारु जीव लेणे कर रया, चे आखा माणसे लाजवाय जाणु चाहजे;
ने तींद्री आखी नावबद्दी जात रवणु चाहजे!
जे मेसेक मारने कर रया;
चे पछा हंय जाणु चाहजे ने लाजवाय जाणु चाहजे!
चे वेरी, वाहळाम उडण्या चारान बगदान तसा हंय जाणु चाहजे,
ने यहोवा भगवानेन सरगेवाळु चाकर्यु, तीनुक बेसके लांबे तक रपटावणु चाहजे।
तींद्री वाट आंदारी ने खीसली जाय असली हंय जाणु चाहजे!
ने यहोवा भगवानेन सरगेवाळु चाकर्यु, तींद्रे पछळ पड़लु रवणु चाहजे
चे माणसे फालतुत मेसेक जाळेम फांदीन मारने कर रया;
ने फालतुत मेसेक मारने करीन मार वाटे खाडु खुद रया।
तीनु वेरी माणसे पर उचकाणुन गरा आय जाणु चाहजे!
ने जी जाळ चे मेसेक फांदणे करीन आथर्या;
तीनी जाळेम चेत फांदाय जाणु चाहजे! असली गरा तींद्रेत पर आय जाणु चाहजे!
बाकुन मारु जीव, यहोवा भगवान मां खुस हवसे;
ने तेरा छुटकारान साहरे खुस हय्न गखळायसे।
मारा आखा हाटका बी असा कवसे,
ए यहोवा भगवान, तार सी वारु काहनु नी हय! काहाकी तु कमजुर माणसेक तीना ताकतवाळा वेरीन हातेम सी छुड़ावे,
तीना वेरी अगळ काहनाक काजे बी उबो नी रवाये। तु, गरीब काजे ताकतवाळा हातेम सी छुड़ावे।
मार वीरुद झुटी गवा देण्या आय्न उबा हंय रया; ने जे गुना मे कर्यु नी,
तीनु गुनान वाराम चे मेसेक पुछे।
मे तींद्री भलाय करो, ती चे मार पर कुहराय करे;
चे असा करे ती मारु जीव घाबराय जाय।
जत्यार चे मांदा पड़्या, तत्यार मे,
गंटाट्यो पांगरीन तींद्रे वाटे उपास पाळ्यु;
ने तींद्रे वाटे रड़ी-रड़ीन दुवा करतु रयु।
ने मारी दुवान फळ मार खुळाम आवती रयो।
जसु एक माणुस, आपसा भाय्स, नीते दुसतीदार वाटे दुखी हवे,
जसु काहनुक आपसी माय वाटे रड़े-कल्पे;
तसुत मे नेचो मुणको करीन रड़ी-कलपीन दुखी हयु।
बाकुन जत्यार मे गरा मां पड़ीन लथड़ने बाजी गुयु,
ती मारा वेरी खुस हय्न भेळा हंय गुया;
ने फुकट्या माणसे, तीनु काजे मे उळखो लग नी, चे बी मारी वीरुद मां भेळा हया;
चे लगातार मारी वात काटता रया।
चे माणसे, तीनु हासी उडाड़न्या पापी पुठे भेसकाय्न,
मार पर रीस करीन मार पर दात ककड़ावे।
ए मालीक-भगवान, तु कत्यार लग छेटु रय्न देखतु रवसी?
हींद्रे सी नाखली गरा मां सी मेसेक छुड़ाय्न बचाड़ ले!
जुवान नाहारेन तसला माणसे सी मारु जीव बचाड़।
तत्यार मे, तारा माणसेन मंडळी मां, तुसेक बेसकु वारु कय्स;
मे बेसका माणसे अगळ तारी बड़ाय करीस।
जे माणसे फालतुत मारा वेरी बण गुयला,
तीनुक मार पर खुस घुण हवणे देय;
जे फालतुत मार भीणी रीस करे;
तीनुक डुळा मीचकारीन हासी घुण करने देय1।
काहाकी चे वेरी माणसे सांतीन वात नी करे, ने जे माणसे देस मां सुकेस रय रया,
तीनुक धुकु दीन तींद्रो नुकसाण करनेन वीच्यार कर्या करे।
चे मार भीणी असलात मुंहडो फाड़ीन कया,
“ओहय! हामु ते तुसेक गुनु करतेलु, डुळे देख रया”।
ए यहोवा भगवान, तु ते जो आखो देख रयु;
हुगु मां रवे! ए मालीक-भगवान!
मारेन्चां सी छेटु मां हवे।
ए यहोवा भगवान! मारु नीयाव करने करीन उठ,
ए मारा मालीक-भगवान, आय्न मारु लड़ाय झगड़ु दुर कर!
ए मारा यहोवा भगवान! तु तारा धरमेन अनसारे मारु नीयाव कर;
ने वेरी माणसेक मार पर खुस मां हवणे देय।
तीनुक मनेम असा कवणेन मुखु घुण आपे,
“ओहोय लाला! हंय हुड़े पड़ रयु काय?
हामु ते तुसेक सार नाख्या, हामरी हेर पुरी हंय गुय!”
जे माणसे मारो नुकसाण हवे ती हासे,
चे एक रंगा काळा कुस हंय जाणु चाहजे!
जे मार वीरुद मां मटाय्न वात करे; तींद्री नाव-बद्दी हवणु चाहजे,
ने चे लाजवाय जाणु चाहजे!
जे माणसे, धरम सी खुस रवे
चे आखा खुस हय्न गखळायणु चाहजे;
ने अळी-अळीन जोत कह्या करनु चाहजे की, “यहोवा भगवानेन बड़ाय हवे,
जु आपसा चाकर्यान सुक-सांती मां खुस हवे!”
तत्यार मारा मुंहडाम सी, तारा धरमेन बारामां दीसराक कह्या करीस,
ने आखु दाहड़ु, मारी जीप सी बड़ाय कर्या करीस।
Source notes (1)
- Cross-reference भजन सहीता 69:4; युहन्ना 15:25
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.