Bhilali Bible
भजन सहीता 34
भगवानेन भलाय ने तेर वाटे बड़ाय
दावुदेन भजन: जत्यार दावुद राजु, अबीमेलक्या राजा अगळ गांडवायणेन ढंगड़ा कर्यु, तत्यार अबीमेलक्यु, दावुद काजे ढासाड़ देदु ने चु जाती रयु। तत्यार चु, जो भजन बणावलु।
मे, हर घड़ी यहोवा भगवानेक वारु कह्या करीस;
ने मे जलम तेरी बड़ाय करतु रय्स।
मे यहोवा भगवानुत पर मटाय कर्या करीस;
जो सामळीन, नीचळा माणसे, खुस हवसे।
आवु! मार पुठे यहोवा भगवानेन बड़ाय करु;
ने आपणु आखा हीळी-मीळीन तेर नावेन गुण गावजे।
मे, यहोवा भगवान धड़े मदत मांग्यु, ने चु मारी मदत कर्यु;
ने चु मारो आखो बीहाणो छेटे करीन मेसेक छुड़ाय लेदु।
जतरा बी भगवान पर भुरसु कर्या, चे आखा खुस हवसे;
ने तींद्रो मुंहडो कदी काळो नी हवे।
मे नी-आसर्यु हतलु, ती यहोवा भगवान धड़े दुवा कर्यु; तत्यार चु मारी सामळी लेदु।
चु मेसेक मारा आखा दुखेम सी छुड़ाय लेदु।
जु, यहोवा भगवानेन बीहाणो मानीन जीवे; तीनाक,
यहोवा भगवानेन सरगेवाळु चाकर्यु, च्यारेमेर घेरवीन तेरी राखवाळी करे।
पारखीन देखु, की, यहोवा भगवान कतरु वारु छे;
बेसकु बरकतवाळु छे चु माणुस, जु भगवानेन आसरु लेय।
ए यहोवा भगवानेन चुखला माणसे, तुहुंं तेरो बीहाणो मानीन जीवु;
काहाकी जे बीहाणो माने, तीनुक चु काहनी बी चीजेन कसर नी हवणे देय।
जुवान नाहार ते खाणाम कसराय जाय, ने चे भुकला बी रय जाय;
बाकुन जे माणसे, यहोवा भगवानेक हेरे तीनुक, चे माणसे काहनी बी वारलु चीजेम नी कसराये।
ए पुर्या मारेन्चां आय्न मारी सामळु;
मे तुहुंं काजे यहोवा भगवानेन बीहाणो मानीन जीवणे सीकाड़ीस।
ए पुर्या, तुंद्रे माय्न काहनु जीवाय्न मजा लेणेन हेर कर रयु;
ए पुर्या, तुंद्रे माय्न काहनु भलाय देखणे करीन वदु जीवणेन आस कर रयु काय?
तारी जीप काजे बुराय करने सी रुक,
ने लुच्चाय करीन दीसराक मां ठगे।
कुहराय छुड़ ने भलाय कर;
सांतीन काम कर, आखा साते भाय भलाय ती रवणेन हेर कर।
यहोवा भगवानेन डुळा, धरमी माणसे काजे देखतु रवे,
ने चु तींद्री लीलघाय सामळ्या करे।
यहोवा भगवान कुहर्याक देखीन अथु भाळ देय;
हेरेसी चु तीनुक खत्तम कर देय ने तींद्रा नाव काजे ईसराड़ देय।
धरमी माणसे लीलघाय करीन दुवा करे, ने यहोवा भगवान दुवा सामळी लेय,
ने तीनुक आखी गराम सी बचाड़ लेय।
यहोवा भगवान टुटला मनवाळा माणसे पुठे रवे,
ने दुख मां पड़ला काजे छुटकारु आपे।
धरमी माणसे पर बेसकी गरा आवे,
बाकुन यहोवा भगवान तीनुक तीनी आखी गरा मां सी छुड़ाय लेय।
भगवान धरमी माणसेन आखा हाटकान राखवाळी करे;
ने तीनु हाटका माय्न एक बी हाटको नी भागे।
कुहर्यु आपसी बुराय्न वजे सी माराय जासे;
ने धरमी माणसेक वेला पाड़े, भगवान वेरीक गुनाळा छे कय्न डंड आपसे।
यहोवा भगवान आपसा चाकर्यान जीव काजे मुल लीन बचाड़े; ने जतरा बी माणसे, भगवानेन आसरु लेय,
भगवान तींद्रे माय्न काहनाक बी तु गुनाळु छे कय्न डंड नी आपे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.