Bhilali Bible
भजन सहीता 33
बड़ायन गीत
ए धरमी माणसे, यहोवा भगवान वाटे,
खुसीन गीत गावु! छाचलीन,
खरला माणसे काजे यहोवा भगवानेन बड़ाय करनु सुबा देय।
पावळी वाजाड़ी-वाजाड़ीन, यहोवा भगवानेक बेसकु वारु कवु;
दस-तार्यु झुणगु वाजाड़ी-वाजाड़ीन, तेरा गुण गावु।
भगवान वाटे एक नवलो गीत बणाय्न,
वाजा-गाजा वाजाड़ीन खुस हय्न जुर्ये-जुर्ये गावु।
काहाकी यहोवा भगवानेन बुल खरलु छे;
तेरा आखा काम, भुरसु करे असा छे।
यहोवा भगवानेक, धरम ने नीयाव वारु लागे;
यहोवा भगवानेन दया आखी, धरती पर भराय रय।
आखी सरग-मंडळी यहोवा भगवानेन बुलेन साहरे घड़ायली छे;
दाहड़ु, चांद ने तारा भगवानेन बुलेन साहरे घड़ायलो छे।
चु, समुदरेन पाणीक ढेरेन तसु भेळो करे;
चु दरीयान पाणीक भेळो करीन उंड्ला खुयारा मां मेल रवे।
आखी धरतीन माणसे यहोवा भगवानेन ईज्जत करनु चाहजे;
आखी कळीन माणसे तेरो बीहाणो मान्नु चाहजे।
काहाकी भगवान कयु तसोन-तसो हंय गुयो;
चु हुकुम आप्यु ती, छाचलीन, तसोन-तसो हंय गुयो।
यहोवा भगवान आखा राजेन माणसेन युजना रीकामी कर देय।
आखा देसेन माणसेन मुजगी फालतु कर देय।
बाकुन यहोवा भगवानेन युजना जलम बन्ली रवसे;
तेरा मनेन वात-वीच्यार जलम पीड़ी-डीट टेकली रवसे।
चे माणसे, बेसका बरकतवाळा छे; तेरु भगवान, यहोवात छे; चे माणसे, बेसका बरकतवाळा छे,
तीनुक यहोवा भगवान, मारा माणसे करीन नेवाड़ लेदु।
यहोवा भगवान सरगेम रय्न भाळ्या करे; चु,
चां रय्न आखा माणसेक देख्या करे।
यहोवा भगवान आपसा जागा पर बठीन, धरती पर रवण्या,
आखा माणसे काजे देख्या करे।
भगवानुत आखान मन काजे घड़्यु;
हेरेसी चु तींद्रा आखा कामेक ने वीच्यारेक वारुत जाणे।
असु काहनु राजु नी हंय चु सीपायड़ान ताकतेन भुरसे नी बच सके,
ने बेसका सीपायड़ान ताकतेन भुरसे राजु आपसा वेरीक नी जीत सके।
भले सीपायड़ान घुल्लान ताकत कतरी बी हय; तेबी,
जीतणे करीन घुल्ला पर भुरसु करनु फालतु छे।
सामळु, जे यहोवा भगवानेन बीहाणो माने, तेरी दया ने परमेन आस करे,
तींद्रे पर यहोवा भगवानेन नींगा रवे;
ने चु तीनुक मुतेम सी बचाड़े,
ने काळ पड़े ती बी, जीवतेला राखे।
आपणु ते यहोवा भगवानेन वाट देखता आय रया;
चु आपणी मदत करन्यु ने हामरी ढाळ छे।
आपणो मन हेरेत मां खुस हये;
काहाकी आपणु तेरा चुखला नाव पर भुरसु कर रया।
ए यहोवा भगवान, जसा हामु तारी आस करता आय रया;
तसुत तु हामरे पर दया देखाड़तु रव।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.