Bhilali Bible
भजन सहीता 32:8
Verse 8 is marked below, with the whole chapter around it. Read from the start
माफी ने संयबरकत
दावुदेन मसकील भजन
चु माणुस बेसकु वारु छे, तीनाक भगवान, तेरा गुनान डंड आपणेन बदले, तीनाक माफी आप देदु।
चु माणुस बेसकु वारु छे, तेरा पाप ढाक देदु।
जु आपसा पापेक साताड़े बीगुर भगवान अगळ मान लेय, ने भगवान तेरा पापेन वजे सी डंड नी आपे,
छाचीन चु माणुस बेसकु बरकतवाळु छे।1
ए भगवान, जत्यार मे, हुगु रयु,
तत्यार आखु दाहड़ु कासी-कासीन मारा हाटका गळ गुया।
काहाकी यहोवा भगवान, तु मेसेक रात दाहड़ु मे तारा हाते करीन मेसेक दाबी देदा;
जसी उंढाळान आहरा मां माणसेन ताकत सर जाय,
तसीत मारी आखी ताकत सर गुय।
बाकुन अळी मे मनेम जो ठाण लेदु की,
“मे मारा आखा पापेक यहोवा भगवान अगळ मान लीस”
तत्यार तु, मारा गलत काम काजे तार अगळ मान लेदु,
ने एक बी पाप-गुनाक तार अगळ नी साताड़्यु, ती, तु मेसेक माफ कर देदु।
हेरसी, जत्यार तारी भक्ती-करन्या, पाप मां पड़ जाय, तत्यारुत तीनुक तार धड़े सी माफी मांगणे करीन तार धड़े दुवा करनु चाहजे।
ती छाचलीन आवतेला खुदरान तसी बेसकी गरा आवसे,
तेबी ची गरा तींद्रेन्चां नी पुगे।
ए भगवान, तुत मारु डुकायणेन जागु छे;
तुत, गरा मां मारी राखवाळी करसी।
ने छुटकारान गीत जुर्येत गावण्या तारा भक्ती-करन्याक,
तु मारे च्यारेमेर उबा करसी।
यहोवा भगवान कह्यु, “मे तुसेक अक्कल आपीन तारी अगवाय करीस, तुसेक सीकाड़ीस, ने तीने वाट्ये चालनु चाहजे,
तीनेत वाट्ये चालाड़ीस, ने मे तारेत पर नींगा राखीन, तारी राखवाळी करीस।
बाकुन तुहुं, तीनु उजाड़्या घुल्ला,
ने चकर गदड़ान तसा बीन-अकल्या मां बणु; जे चालाड़नेन टेमे,
रास ने लगाम बीगुर बदे नी।”
कुहर्या माणसे काजे, बेसकी वेला करनु पड़से;
बाकुन जु यहोवा भगवान पर भुरसु करसे, तीनाक,
दया सी घेरवी रवसे।
ए धरमी माणसे तुहुंं यहोवा भगवानुत मां खुस ने मजा मां रवु!
ए आखा सुद्ला माणसे खुस हय्न,
भगवानेन गुण गाया करु!
Source notes (1)
- Cross-reference रोमीयो 4:7,8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.