Bhilali Bible
भजन सहीता 22
मनेन दुखवाळान दुवा ने खुसीन गीत
दावुदेन मीसमर भजन; भजन-गावण्यान डाहला वाटे: संदारलान हरणीन रेंगो मां गावजु।
ए मारा भगवान! ए मारा भगवान! तु मेसेक काहा वीसरी गुयु?1
मारी मदत करे पाकुर, मेसेक छुड़ीन अतरु लांबे काहा जाती रयु?
मे कासतु ने आयड़तु जाय्न दुवा कर्यु तेबी तु मारी काहा नी सामळ्तु?
ए मारा भगवान! मे दीसु तारे धड़े दुवा करो,
बाकुन तु मेसेक जपाप नी आप्यु;
ने मे राते बी हुगु नी रवो
बाकुन तु ते चुखलु छे; ने ईस्रायली माणसे तारा गुण गाय रया;
तु तींद्रा गीतेन राजगादी पर राजान तसु बस रयु।
ए भगवान हामरा डाहा-डाहा तारेत पर भुरसु करतेला;
चे भुरसु कर्या ने तु तीनुक छुड़ाय लेदु।
जत्यार चे तार धड़े आयड़ी-आयड़ीन दुवा करया,
ने तु तीनुक छुड़ाय लेदु; चे तारेत पर भुरसु करता रया; ने तु तींद्री आस टुटणे नी देदु।
बाकुन मे ते कीड़ा सांय छे, माणुस सांय नी हय; माणसे मारी नाव-बद्दी करे,
ने मार भीणी रीस करे।
जे-जे माणसे मेसेक देखे, चे आखा मारी हासी उडाड़े; ने चे-चेत, आंबा-साबा डुळा मीचकारे,
ने असा कवता जाय्न मुणको हालाड़े,2
“चे ते कवे, यहोवा भगवान पर बेसकु भुरसु करतेलु;
ती चु तुसेक काहा नी बचाड़्यु?
चु तार सी खुस हंय ती,
चु तुसेक काहा नी छुड़ावतु?”3
बाकुन ए भगवान! तुत मेसेक माय्न कुखेम सी नीकाळ्यु;
जत्यार मे माय्न दुत पीतलु; तत्यार तु मेसेक वारु समाळ्यु।
पयदा हयु तीं सीत मेसेक तार भुरसे मेल देदा,
मे माय्न कुखेम हतलु, तीं सीत तु मारु भगवान छे।
मार सी छेटु मां हवे,
काहाकी गरा मार धड़्येत आय रय,
ने मारी मदत करन्यु काहनु नी हय।
सांड्यान तसा बेसका सावटा वेरी मेसेक घेरवी रया,
बासान नावेन बयड़ाम रवण्या,
ताकतवाळा सांड्यान तसा चे मेसेक घेरवी रया।
चे फाड़न्या नाहरेन तसा,
ने फाड़ने ने आयड़ने वाळा नाहरेन तसा मार भीणी मुंहडो फाड़ रया।
मे पाणीन तसु उही गुयु,
ने मारा आखा हाटका जुड़म सी नीसटी गुया;
मारो मन मोमबत्तीन तसो पीगळी गुयो,
मारो डील मांहे की मांहे पीगळी गुयो।
मारा डीलेम ताकत नी रय, मे धुळान तसु सुकी गुयु;
ने मारी जीप ताळवे चस्टी गुय; मे हंय धुळा मां भेसकाय जाम;
तु ते मेसेक मरने करीन छुड़ देदु।
देखु! जम माणसे,
कुतरान टुळान तसा मेसेक च्यारुमेर घेरवी रया;
चे नाहरेन तसा मारा हातेम ने पायेम डुचा पाड़ देदा4।
मे ते हारीन आखु सुकाय गुयु, चे एकेक करीन मारा आखा हाटका गीण लेय।
मारा वेरी मार भीणी एक-हेट्या भाळ रया।
चे वेरी माणसे मारा पुथल्या वाटणे बाजी रया;
ने चे मारा पुथल्या वाटे चिट्ठी नाखीन सारु बी देखणे बाजी रया।
हय, ए यहोवा भगवान, तु मारेन्चां सी छेटु मां रवे!
ए मारा ताकतवाळा भगवान, मेसेक बचाड़ने छाटु आव!
वेरी मेसेक तलवार सी मारने हींडे; हेरेसी मेसेक बचाड़!
जे वेरी कुतरान तसा मेसेक तातड़ीन मारने हींडे; ए भगवान! मेसेक बचाड़!
मेसेक नाहरेन मुंहडाम सी तु मेसेक छुड़ाय ले! जे जंगली सांड्या, मार सींगड़ा घुदल्ने हींडे;
तु मेसेक बचाड़! ए भगवान! तु मारी दुवा सामळी लेदलु छे।
हेरेसी मारा भायस्यो मां, मे तुसेक नावलीया करीस;
तुसेक मानन्या माणसेन मंडळी मां, तारीत बड़ाय कर्या करीस।
ए यहोवा भगवानेक बीहण्या माणसे,
भगवानेन गुण गावु! ए याकुब्यान आखी अवल्यात, तुहुं आखा हेरी बड़ाय करु!
ए आखी ईस्रायलीन अवल्यात, तेरो बीहाणो मानु।
काहाकी भगवान, दुखी माणसेन दुवा सामळी लेदलु।
ने नी तींद्रे सी रीस करे, ने नी तेरे सी अथु भाळे
बाकुन जत्यार चु भगवान सी दुवा कर्यु, तत्यार चु सामळी लेदु।
माणसेन भरायला मटला टुळा मां, तारी बड़ाय करने वाटे तुत मेसेक ताकत आपे।
जे तारो बीहाणो माने,
तींद्रे अगळ मे मारी मान्ता पुरी करीस।
गरीब माणसे रुटा खाय्न आफरी जासे;
ने जे यहोवा भगवानेक हेरने बाजी रया, चे भगवानेन गुण गावसे,
ने चे खुस हय्न जलम जीवतेला रवसे!
धरतीन आखी दुर रवण्या माणसे यहोवा भगवानेक हेर करसे;
ने चे तेर भीणी पछा आवसे;
आखा राजेन माणसे, ने आखी कुळीन माणसे, भगवान अगळ ढंगा वळीन पाये पड़से।
काहाकी यहोवा भगवानेन राज-पाट चाल रयो,
चु आखा; देसेन माणसे पर बी राज कर रयु।
धरतीन आखा मातला माणसे बी भगवान अगळ ढंगा वळीन पाये पड़से;
चे आखा जे मरनेतवाळा छे, चे आखा, भगवान अगळ ढंगा वळीन मांडा टेकसे, जे हंय धुळाम भेसकाय गुयला।
हय्न अवल्यात भगवानेन सेवा करसे;
ने आवती पीड़ी काजे मालीक भगवानेन बारामां कवसे।
ची आवती पीड़ी बी, अगली पीड़ीक, यहोवा भगवानेन धरमेन बारामां असा कवसे की,
यहोवा भगवान ते आपसा माणसेक बचाड़ रयु।
Source notes (4)
- Cross-reference मत्ती 27:46; मरकुस 15:34
- Cross-reference मत्ती 27:39; मरकुस 15:29; लुका 23:35
- Cross-reference मत्ती 27:28
- Footnote नाहारेन तसा
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.