Bhilali Bible
भजन सहीता 21
जीतणेन पछे भगवानेन बड़ाय
भजन-गावण्यान डाहला वाटे: दावुदेन मीसमर भजन।
ए यहोवा भगवान, राजु खुस हय्न गखळायसे, काहाकी तु तीनाक ताकत आपे;
ने राजु बेसकु खुस हय्न गखळायसे;
राजु वारलु मने जो कांय मांग्यु, चो आखो, तु तीनाक आप्यु,
ने मे तुसेक नी आपतु करीन तु नी कयु।
ए भगवान! तु राजाक बेसकु वारु संयबरकत आपतु जाय्न भेटे,
ने तेरा मुणका पर सोनान बणावली पागड़ी पेहरावे।
राजु तार धड़े जीवाय मांग्यु, ने तु तीनाक जीवाय आप देदु;
तु तीनाक जलमकी जीवाय आप्यु।
तारी मदतेन साहरे भगवानेन सेक-सींगार मटी छे,
ने तु तीनुक सुक ने मजा आप्यु।
ए भगवान, तु राजाक जलमकी संयबरकत आप्यु, ने ए भगवान,
तु तेरे पुठे रवे, करीन चु बेसकु खुस रवे;
काहाकी राजु, यहोवा भगवान पर भुरसु कर रयु। आखाम उचा रवण्या भगवानेन साहरे,
दया ने परमेन साहरे, तेरो राज नी सरे,
ने चु जलम राज करसे।
ए भगवान! तु तारा आखा वेरी काजे हेर लेसी;
ने तारा जेवड़्या हाते तु आखा वेरीक हेरीन धर पाड़सी।
ए भगवान, तु तारी हजुरी मां, तीनु वेरीक भाटीम आक्ठीन तसु,
हळो-हळो धपाड़ देसी;
यहोवा भगवान आपसी रीस मां तीनुक गीळ जासे,
ने लाकड़ान तसु बाळीन रखड़ु कर देसे।
ए भगवान! तु तींद्रा आखा पुर्या-पारी काजे धरती पर जीवतेला नी रवणी देय;
तींद्री आखी अवल्यात काजे मारीन सार देसी।
काहाकी चे वेरी तारो नुकसाण करने करीन वीच्यार कर्या करे;
बाकुन तींद्रु जु वीच्यार कदी पुरु नी हवे।
काहाकी तु तारी धंद्ली तीनु वेरी पर चहड़ावजी,
ने चे पछा वळीन ढासी जासे।
ए यहोवा भगवान! आपसी ताकत मां मटु हंय जा!
ने हामु गाय-गाय्न तारी ताकतेन भजन सामळावसु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.