Bhilali Bible
भजन सहीता 20
जीतणे करीन दुवा
भजन-गावण्यान डाहला वाटे: दावुदेन मीसमर भजन।
गरान टेमे यहोवा भगवान तारी दुवा सामळे; ने याकुब्यान भगवान तारी राखवाळी करनु चाहजे!
ने तीनुक उचला जागा पर नेवाड़े।
भगवान सीयोन बयड़ा पर चुखला-जागा मां सी आय्न,
तारी मदत करे;
भगवान तारी चड़ावली आखी भेट काजे हेर करनु चाहजे;
ने चु तारी बादाक आवरी लेणु चाहजे;
भगवान तारा मनेन आखी मरजी पुरी करे;
ने तारा आखा वारलु वीच्यार काजे पुरा करे।
तत्यार हामु तारी जीतेन साहरे, खुस हय्न, बेसका जुर्ये गावसु,
ने आपणा यहोवा भगवानेन नावे झंडा गाड़सु। असु करीन यहोवा भगवान तारी आखी वारलु मांग काजे पुरी करे
हंय मे पाक्कु जाणो की, यहोवा भगवान आपसा नेवाड़ला राजाक छुड़वी लेय;
भगवान चुखला सरग सी तेरी दुवान जपाप आपे।
चु आपसा जेवड़्या हातेन ताकतेन साहरे राजाक जीताड़े।
काहनास ते घुल्ला पर भुरसु करे,
ने काहनास ते घुड़ा-गाड़ी पर मटाय करे,
बाकुन हामु ते हामरा यहोवा भगवानुत पर भुरसु करजे।
चे माणसे ते ढंगा वळ गुया, ने हीट पड़्या;
बाकुन हामु जीतीन टेकला रह्या।
ए यहोवा भगवान, हामरी दुवा सामळीन हामरी मदत करजी;
ने हामरा राजाक जपाप आपजी।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.