Bhilali Bible
भजन सहीता 19
कळी मां भगवानेन सेक-सींगार
भजन गावण्यान डाहला वाटे दावुदेन मीसमर भजन
सरग भगवानेन सेक-सींगारेन बारामां गवा दी रयु;
सरगेन तारा मंडळी ने भगवानेन हुनर काजे उजेंतु देखाड़ रयु।
ने चे भगवानेन अक्कल काजे,
रात ने दाहड़ु उजेंता देखाड़्या करे।
आपणेन तसी हींद्री बुली नी हय,
ने नी आपणेन तसा हीनुक बुलाये नी।
भगवानेन खबर आखी धरतीन खुणे-कुपरे पुग गुयली छे,
भगवानेन बारामां हींद्री गवाय कळीन छेव लग, भाती-भातीन बुली-बुलन्या माणसेन ईचमां बी पुग गुय।1
चु दाहड़ा वाटे सरग काजे एक तम्बुन तसु ताण रयु।
जसु नवलु लाडु आपसा घर मां सी नीकळे;
चु वारलु दवड़न्यान तसु आपसु दवड़े ने खुस हवे।
तसुत दाहड़ु बी सरगेन एक धड़्ये सी नीकळे;
ने चु दीसरे धड़्ये लग जाय्न अळी पछु पली धड़्ये नीकळे;
ने तेरु सेक आखाक लागे।
भगवानेन कायदु
यहोवा भगवानेन नेम-कायदा खरला छे,
ने जे जीवाय काजे ताब्ली कर देय;
यहोवा भगवानेन गवाय भुरसु करे असी छे,
जे नेम-कायदा भुळा माणसेक अक्कल आपे।
यहोवा भगवानेन कायदा वारु छे,
जीव काजे खुस कर देय;
यहोवा भगवानेन हुकुम उजळा छे,
ने जे कायदा आपणु काजे देखणे-समजणेन वीजाळो आपे।
यहोवा भगवानेन बीहाणा मां रवणु चुखली वात छे:
जो बीहाणो जलमको टेकलो रवे;
यहोवा भगवानेन नीयाव खरला छे;
ने जे जलमका धरमवाळा छे।
यहोवा भगवानेन नेम-कायदा ते सोना सी वारु छे, चुखला सोना सी बी बेसका वारु छे।
जे कायदा मुहाळ सी गुळ्या छे; आपसात चुवण्या मुहाळ सी बी, गुळ्या छे।2
तेरेत साहरे तारा चाकर्या काजे हुस्यार रवणेन सीक जड़े।
ने जे कायदा पाळे, ती मेसेक बेसकु फायदु जड़े।
असु माणुस आपसी गलतीन बारामां अनजाण्यु रवे।
हेरेसी ए भगवान! सातायला पाप सी मेसेक बचाड़।
तु तारा चाकर्या काजे जापताये राख की, मे जाणी बुजीन पाप नी करो;
ने जे पाप मार पर राज नी करनु चाहजे!
तत्यार मे नी-गुनाळु हंय जाय्स,
ने मटला पाप सी बचीन रय्स।
ए यहोवा भगवान! तु मार वाटे चापर्यान तसु आसरु आपण्यु छे, ने बचाड़न्यु छे!
जी मारी आस छे की, मारा मुंहडान बुल ने मनेम वीच्यार जलम तुसेक गवती रवे।
Source notes (2)
- Cross-reference रोमीयो 10:18
- Cross-reference भजन सहीता 119:103
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.