Bhilali Bible
भजन सहीता 18
दावुदेन जीतणेन गीत
(2 समुवेल 22:1-51)
भजन-गावण्यान डाहला वाटे: यहोवा भगवानेन चाकर्या दावुदेन एक गीत। चु ईना गीतेन बुलेक तीने दाहड़े कयु, जत्यार यहोवा भगवान तीनाक आखा वेरीन ने सावुल राजान हातेम सी छुड़ायु, ने चु असु कयु,
ए यहोवा भगवान, तु मारी ताकत छे,
मे तार सी परम करो!
यहोवा भगवान मार वाटे आड़ आवण्या सय छे;
ने कीलान अवारकुट सय छे; ने मारु छुड़ेवण्यु छे,
ने मारु भगवानुत मार वाटे चापर्यान दरो सय छे;
तेरेम मे साताय्न आसरु लम;
चु मारी आड़-आवणी ढाळ छे;
ने मेसेक छुड़ावण्यु छे जु काहनाक बी दात नी देय, ने मारा आसरान कीलु छे।
यहोवा भगवान ते गुण गावाये असु छे,
मे तेरे सी आयड़ीन दुवा कर्यु,
ने चु मेसेक मारा वेरी सी बचाड़ लेदु।
मोतन दांवा मेसेक बांद लेदा,
ने गरा खुदरान तसी आय्न कळ-कळीम वीताड़ रय।
पाताळेन दांवा मेसेक च्यारे-मेर सी घेरवी रया;
ने मोतन फांदे मार अगळ आय गुया।
मारी गरा मां, मे यहोवा भगवान काजे आयड़्यु;
मे मारा भगवान धड़े दुवा कर्यु,
ने चु सरगेन आपसा मंदीर मां सी मारी दुवा सामळी लेदु,
ने तेरे अगळ मारी दुवा पुगी गुय।
मारी दुवा सामळीन, यहोवा भगवान आपसा वेरी भीणी कीचवाय पड़्यु,
तत्यार धरती धदड़ीन, कापणे ने फाटणे बाजी गुई;
ने बयड़ान पाया थुड़ बसतात कापीन धदड़ी पड़्या।
तेरा नाकेम सी कुळ्ळु नीकळ्यु; ने मुंहडाम सी आक्ठो नीकळीन बाळने बाजी गुयो;
तेरेसी कुयला बी हळो-हळो धपणे बाजी गुया।
चु सरग काजे नेचु वाळीन उतरी आयु; ने तेरा पाय तळे आंदारो-डुब हतलो।
ने चो तीनाक ढाक रवलो।
चु एक करुब पर बसीन;
वाहळा मां बेसकु-जुर्ये उड्यु।
भगवान आंदारला काजे, पाणी भरला काळ्ळा वादळान आंदारला काजे,
ने सरगेन काळ्ळा वादळा काजे, आपसु डुकायणेन जागु बणाय लेदु। ने आपसे च्यारे-मेर वाड़ बणाय लेदु।
तेरी हजेरीन सेक मां सी काळ्ळा वादळा नीकळ्या,
हेरे पुठे गारे ने इंगाळा बी नीकळ्या।
ती यहोवा भगवान सरगेम सी गाज्यु;
ने आखाम उचे रवण्यु यहोवा भगवान आपसो बुल सामळायु; तत्यार गारे ने इंगाळा बी पड़्या।
भगवान आपसा वेरीक बीलखाटी-बीलखाटीन रावण्या-तीवण्या कर देदु;
तींद्रे पर ईजळी पाड़ी-पाड़ीन छेदर्या-छेदर्या कर देदु।
ए यहोवा भगवान, जत्यार तु समुदरेक हुकुम आप्यु;
तत्यार समुदरेन पाणी छेटे हंय गुयो,
ने समुदरेन बुंदो देखायणे बाजी गुयो; तारा नाकेन दमेन साहरे धरती फाट गुय,
ने धरतीन पायु लग देखाव पड़्यु।
तत्यार भगवान उपर सी आय्न मारु हात धर लेदु,
ने चु मेसेक उंड्ला पाणीम सी नीकाळ लेदु।
चु मेसेक तीना ताकतवाळा वेरीन हातेम सी,
ने मार भीणी रीस करने वाळान हातेम सी छुड़ाय लेदु।
काहाकी चे मार सी वदु ताकतवाळा हतला।
जत्यार मारी गरा कळ-कळीम इती, तत्यार चे मार भीणी जुर करीन आया,
बाकुन यहोवा भगवान मेसेक आसरु आप्यु;
ने गराम सी नीकाळीन वारु मोकळा जागाम ली आयु,
चु मेसेक बचाड़्यु; काहाकी चु मार ती खुस हतलु।
यहोवा भगवान मारा धरमेन अनसारेत मार साते वेहवार कर्यु,
तेरी नींगा मां मारा हात चुखला हतला, तेरेमां चु मेसेक संयबरकत आप्यु।
मे यहोवा भगवानेन कह्याम चाल्या कर्यु!
ने कुहर्या माणसेन वजे सी भगवान सी छेटु नी हयु।
काहाकी तेरा आखा नेम-कायदा मार अगळ छे,
ने मे तेरा नेम-कायदाक नी छुड़्यु।
मे तेरे अगळ वारु बणीन रयु;
ने मे पाप सी छेटे रयु।
यहोवा भगवान मारा धरमेन अनसारेत मार साते वेहवार कर्यु,
तेरी नींगा मां मारा हात चुखला हतला, हेरेसी चु मेसेक संयबरकत आप्यु।
ए भगवान! तु दयाळा साते दया देखाड़े;
ने खरला माणुस अगळ; तु आपसा काजे खरलु देखाड़े।
चुखला अगळ, तु आपसा काजे चुखलु देखाड़े,
ने एकधड़्या अगळ, तु आपसा काजे चतराळ्ळु बणाय लेय।1
काहाकी तु नीचळा माणसेक बचाड़े,
बाकुन मटाय करन्याक लाजवाड़ देय।
हव, मारी जीवाय्न दीवाक तुत धपाड़े; ए मारा यहोवा भगवान,
तुत वीजाळो करीन, मारी जीवाय्न आंदारा काजे छेटे कर देय।
काहाकी तारी मदतेन साहरे मे सीपायड़ान टुळाक बी बीहाड़ दम;
मारा भगवानेन मदतेन साहरे अवारकुट काजे बी येणकी जाम।
भगवानेन वाट ते चुखीझण छे;
यहोवा भगवानेन बुल ते चांदीन तसो चुखो करलो छे;
भगवान तीनु आखा वाटे आड़-आवणी ढाळ छे,
यहोवा भगवानेक छुड़ीन कुण भगवान छे?
आपणा भगवानेक छुड़ीन कुण चापर्या संय आड़ आवे?
भगवान मेसेक ताकत आपीन मारी काठी कमर कर देय, ने मारी जीवाय्न वाट काजे चुखीझण बणाय देय।
चु मारा पायेक हरनीन पायेन तसा काठा कर देय,
ने मेसेक उचला बयड़ा पर ली जाय्न उबु कर देय।2
चु मेसेक लड़ाय करने सीकाड़े।
मारा हातेम अतरी ताकत छे; मे पीतळेन मटली धंदली सी बीलखी दी लम।
बचणे करीन तु मेसेक तारी ढाळ आपलु छे;
ने तारु जेवड़्यु हात धरीन तु मेसेक चालाड़ रयु,
ने तारी मदत सी मेसेक मटु बणावलु छे।
तु मारी चालनेन जागा मोकळी करलु छे;
ने मे खीसलीन पड़्यु नी।
मे मारा वेरी पछळ पड़ीन तीनुक धर लीस
ने तीनुक जीत नी लम, तत्यार लग पछु नी वळो।
मे तीनुक अतरु घायल करीस, की चे मार पाये अगळ हीट पड़से,
ने तीनुक पछो उठाये नी।
लड़ाय करने करीन तु मेसेक ताकत आपलु छे;
ने जे मारी वीरुद करला छे, तीनुक मार पाये पड़ावलु छे।
तु मारा वेरीक पछा वाळीन, मारेन्चां सी ढासाड़ देदु;
ने असु करीन मे ईनु रीस करन्याक खत्तम कर देदु।
मारा वेरी बचणे करीन मदत मांग्या, बाकुन काहनु बी बचाड़ने नी आयु;
चे यहोवा भगवान काजे बी आयड़्या, बाकुन चु कांय बी जपाप नी आप्यु।
तीनुक मे कुची देदु ने चे छयड़ान तसा हय-गुया; तीनाक वाहळी उडाड़ ली जाय।
मे तीनुक वाट पर पड़ला कादवड़ान तसु भेसकी देदु।
तु मेसेक लड़ाक्या माणसेन हातेम सी छुड़ायु,
ने राज-राजेन माणसेन मुखी बणायु।
तीनु माणसेक मे जाणो लग नी, चे मारा हक मां हय्न मारी चाकरी करे।
दीसरा देसेन माणसे मार बारामां सामळीन; मार अगळ हीट पड़से;
ने चे मांड्ये-मांड्ये चालीन मारो हुकुम मानसे।
चे घाबराय गुया, ने कापता जाय्न
तींद्रा दगड़ान बन्ला कीलाम सी बाहर नीकळ्या।
यहोवा भगवान जीवतेलु भगवान छे,
चापर्यान तसु मेसेक आसरु आपण्यु भगवान वारु छे; मारा छुड़ावण्या भगवानेन बड़ाय हवे!
चु आखा देसन माणसे काजे मारा हक मां करीन बदलु लेदु।
ने बदलु लेण्या मारा भगवानेन बड़ाय हवे!
छाचलीन मेसेक मारा वेरीन हातेम सी छुड़ावे;
तुत मेसेक मारा वीरुदी माणसे अगळ सी उचु कर देय;
ने लड़ाक्या माणसेन हातेम सी मेसेक बचाड़े।
हेरेसी मे आखा राजेन माणसे अगळ तुसेक बेसकु वारु कय्स,
ने तुसेक नावलीन तारो भजन गाय्स।3
यहोवा भगवान बेसकी लड़ाय मां जीतणे करीन आपसा राजान मदत करे,
चु आपसा नेवाड़ला दावुद पर ने तेरी अवल्यात पर पीड़ी-डीट दया करतु रवसे।
Source notes (3)
- Cross-reference नीतीवचन 3:34
- Cross-reference हबक्कुक 3:19
- Cross-reference रोमीयो 15:9
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.