Bhilali Bible
भजन सहीता 17
एला पाड़न्या सी बचणे करीन खरला माणसेन दुवा
दावुदेन एक दुवा
ए यहोवा भगवान! मारी खरली दुवा सामळ,
मारो रड़नु-कलपणु सामळ!
मे ईमानदारी सी कय रयु मारी दुवा सामळी ले!
मार भीणी हय्न तुत मारु नीयाव कर!
काहाकी मारी खरली वातेक तुत जाणे।
तु मारा मन काजे दीसु बी पारख्यु ने राती बी पारख्यु,
ने जाण लेदु की, मारेम काय बी खुड़ नी हय;
मे मारा मनेम ठाण लेदु की दीसरान तसु झुट नी मेको।
मे तारा हुकुम मानतु जाय्न,
लड़ाक्या माणसेन वाये नी लागो
मे तारात कह्याम चाल रयु;
अळी मारा पाय खीसल्या नी।
ए भगवान, मे तार धड़े दुवा करो, काहाकी मे जाणो की,
तु मेसेक जपाप आपसी। धीयान लागाड़ीन मारी लीलघाय सामळ।
जे वेरी सी बचणे करीन तार आसरे आवे, तीनुक छुड़वण्यु तुत छे;
तु ते तीनुक तार जेवड़्ये हाते बचाड़े! अळी मेसेक तारी दया ने परम वारु रीते देखाड़।
मेसेक तारा डुळान टीकी समजीन, मारी राखवाळी कर;
मेसेक कुकड़ीन पीच्यान तसु तारा पाखड़ा तळे साती ले,
तीनु कुहर्या माणसेम सी जे मेसेक एला पाड़ रया,
ने जे वेरी मेसेक मारने करीन घेरी रया।
तीनुक इतरीक बी दया नी आवे; बाकुन चे मटाये मटी-मटी वात कर्या करे।
हामु जां बी जाजे चां हंय हामुक च्यारे-मेर घेर रया,
चे मेसेक भुयमां आसटीन मारने करीन बठ रया।
जसु नाहार जानवर्या भीणी सीकार करने तकाय रवे,
ने जुवान नाहारेन तसु तकायन जागा मां बठ रवे।
ए यहोवा भगवान, उठ! ने तींद्रे साते लड़ाय्न तीनुक आसटी दे!
ने तारी तलवारेन जुरे मारा जीव काजे वेरी सी बचाड़।
ए भगवान!
तारु हात अगु करीन,
मेसेक ईनी कळीन माणसे सी बचाड़ ले;
ईनुक दाणा आपीन तुत हींद्रो पेट भरे।
हींद्रा पुर्या-पारीक बी तुत पुसे, ने जो रयो खयो धन आपसा पुर्यान-पुर्या वाटे मेल दीन मर जाय।
तींद्री जीवाय्न वाटु ईनी कळीम अतरुत छे।
बाकुन मे ते धरमी हय्न तारा मुंहडाक देखीस,
जत्यार मे जागीस तत्यार तारा सीकाक देखीन मे आफरी जास्य।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.