भजन सहीता 16

भुरसा वाटे दुवा

दावुदेन एक मीकताम भजन

1ए भगवान मारी राखवाळी कर, काहाकी मे तारेत आसरे आवलु छे।

2मे यहोवा भगवान काजे कयु, “तुत मारु मालीक छे;

ने मारी आखी भलाय तारेत मां छे।”

3धरती पर जे चुखला माणसे छे, तीनात काजे ईज्‌जत जड़े,

ने मे तींद्‌रेत पुठे खुस रवो।

4जे पारका देवतान पुजा-पाट करने जाय,

तीनुक बेसका वेला करनु पड़से,;

मे देवताक पुजण्‌या साते भेसकाय्‌न, देवताक लुहींन-बादा नी चड़ावो;

ने मारा हुटड़ा सी तीनु देवतान नाव नी लम।

5ए यहोवा भगवान तुत मारो आखो काय छे;

जो काय मेसेक चाहजे चो तु मेसेक आपे;

तुत मारा हीस्‌सा काजे बचाड़ीन राखे!

6तारु भेट मारे वाटे कतरु वारु छे,

ने चे कतरा वारु छे।

7मे यहोवा भगवान काजे वारु कवो, बाकुन चु मेसेक अक्‌कल आपलु छे;

ने मारो मन बी मेसेक दाहड़ीत राती-राती सीकाड़े।

8मे जलम यहोवा भगवान भीणी भाळ रवो: चु मारा जेवड़्‌ये आंगे रवे;

अळतेन मे कसला बी दुखेम नी पड़ीन रवो।

9अळी मारो मन बी बेसको खुस रवसे, ने मारु जीव-आत्‌मा बी बेसको खुस हवसे;

ने मारो डील बी सुक-सांती सी रवसे।

10काहाकी तु मारा जीव काजे मोतेनकळो मां नी नाखे।

ने तु तारा खरला भगत काजे सड़ने नी देय।1

11तु मेसेक जीवाय्‌न खरली वाट देखाड़जी;

तारी हजरी मां रवणे सी मेसेक बेसकी खुसी जड़े,

तार जेवड़्‌ये आंगे जलम बेसकी खुसी रवे।2