Bhilali Bible
भजन सहीता 15
सीयोन देस मां रवण्या भगवान पुठे कुण रवसे?
दावुदेन एक भजन
ए यहोवा भगवान, तारा चुखला तम्बु मां कुणीक रवायसे?
हीना तारा चुखला बयड़ा पर कुणीक हजुर हवायसे?
यहोवा भगवान कह्यु, चु अतरुत रवसे, जु बीन-गुनाळी जीवाय जीवे,
चु भगवानेन धरमेन वारलु वेहवार करे;
ने जु जलम आखा मने छाची वात कवो।
चु अतरुत हजुर हवसे, जु दीसरान वाक नी नीकाळे,
ने जु दुस्तीदारेन कुहराय नी करे। ने जु आपसा चांदे वाळान नाव-बद्दी सामळे,
चु तीनु माणसेन ईज्जत नी करे चे भगवान सी रीस करे;
बाकुन जु यहोवा भगवानेन बीहाणो मानन्यान ईज्जत करे।
जु सगुन खाय्न वादु करलु छे, चु बदले नी
भले तीनाक नुकसाण बी झेलनु पड़े।
जु आपसा रुप्या गरीब माणसेक ईयाज पर नी आपे।
बाकुन चु, नी-गुनाळान नुकसाण कराड़ने करीन दीसरा माणसेक पयस्या आपे तेबी, नी लेय।
जु काहनु असी जीवाय जीवीन चाले चु जलम भगवान अगळ टेकलु रवसे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.