Bhilali Bible
भजन सहीता 14
माणसेन वीन-अक्कल ने कुहराय
(भजन सहीता 53)
भजन-गावण्यान डाहला वाटे: दावुदेन भजन।
बे-अकल्या माणसे आपसात मनेम कया,
“भगवान हंय नी।”
चे आखा बीगड़ला छे,
चे रीस आवे तसलात पाप करे,
तींद्रे मां भलाय करन्यु काहनु नी हय।
भगवानेक जाणने करीन सुर पड़न्या अकलवाळा माणुस हंय की नी हय?
जो देखणे करीन यहोवा भगवान,
सरगेम सी आखा माणसे पर नींगा नाख्यु।
बाकुन आखा माणसे भगवानेन खरली वाट्ये सी भटकी गुया,
चे आखा एक सारका बीगड़ी गुया;
भलाय करन्या कुय नी हय,
एक बी नी हय।1
कुहर्यान, इतरीक बी अक्कल नी हंय काय?
जसा रुटु सेट्लात खाय लेय;
तसात जे, भगवानेन माणसेक सेट्लात लुटीन खाय रया।
ने जे यहोवा भगवानेन नाव लग नी लेय।
बाकुन भगवान धरमी माणसे पुठे जलम रवे;
जो देखीन कुहर्या माणसे बेसका बीही गुया।
ए कुहर्या, तुहुंं ते गरीब माणसेन युजना काजे फालतु करनेन कर रया,
बाकुन यहोवा भगवान ते तीनुक आसरु आपसे।
ईस्रायली काजे छुड़ावणे करीन सीयोन सी भगवान हंय आय जासे ती,
बेसको वारु हंय जाय! जत्यार यहोवा भगवान आपसा माणसेन दाहड़ा वाळसे,
तत्यार याकुब,
ने ईस्रायली बेसका खुस हवसे।
Source notes (1)
- Cross-reference रोमीयो 3:10-12
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.