Bhilali Bible
भजन सहीता 13
गरा आवणेन टेमे मदत वाटे दुवा
भजन-गावण्यान डाहला वाटे: दावुदेन मीसमर भजन।
ए यहोवा भगवान! तु कत्यार लग मेसेक ईसेरलु रवसी? तु जलमकुत मेसेक ईसरी जासी काय?
तु कत्यार लग तारो मुंहडो साताड़ीन रवसी?
मे कत्यार लग फीकुर मां पड़ीन रहो?
का तक मे मारा मन काजे मानाड़तु रहो?
कत्यार लग मारा वेरी मार पर हक जमाड़ता रवसे?
ए यहोवा भगवान! मार भीणी नींगा नाख, मारी दुवा सामळीन मेसेक वारु कर।
मारा डुळाक उघाड़ दे; नीते मे मरीन गहरी नींदे सुय जाय्स;
ने असो नी हवे की मारा वेरी कवसे, “हामु हीनाक जीत लेदला छे”,
ने जत्यार मे कमजुर हंय जाय्स, ती मारा वेरी खुस हय्न मारी हासी उडाड़से।
बाकुन मे तारी परम ने दया पर भुरसु करलु;
जत्यार तु मेसेक बचाड़सी, ती मे बेसकु खुस हय्स।
मे भगवानेन नावेन भजन गाय्स;
काहाकी चु मारी भलाय करलु छे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.