Bhilali Bible
भजन सहीता 12
मदत वाटे दुवा
दावुदेन मीसमर भजन; भजन-गावण्यान डाहला वाटे सेमीनीथ रेंग मां गावजु
ए यहोवा भगवान, हामुक बचाड़!
काहाकी माणसे मां सी भुरसु करन्या एक बी नी बच्या;
तारी भक्ती करन्या माणसे मर गुया।
माणसे आंबा-सांबा आपसा दुसतीदार्या काजे लुच्चाय मेके;
चे आखान-आखा एक दीसरान खुसामद करीन धुकु देय।
ए यहोवा भगवान!
एक दीसराक खुस करनेन वात करन्यान जीप काट देय।
चे कवे, हामु झुट मेकीन जीत जासु,
हामुक जो कवणे लागे चो कवसु,
हामरे पर हक जमाड़ीन हामुक कवण्यु मालीक कुण छे?
बाकुन यहोवा भगवान कवणे बाजी रयु;
“गरीब ने नी-आसर्या माणसे, आखी वातेम लुटाय रया ने कासणेन वजे सी,
हंय मे उठीन आय्स,
ने जे आसरान हेर कर रया, मे तीनुक आसरु आपीस।”
यहोवा भगवानेन बुल चुखलो छे;
चे बुल भाटी मां सात कावा गाळीन,
ने बबड़ायन चुखी करली चांदीन तसो चुखलो छे।
तुत ए भगवान तींद्री राखवाळी करसी,
ने तीनुक ईना जमानान माणसे काजे जलमकु बचाड़ीन राखसी।
जत्यार माणसे तीनु कुहर्यान ईज्जत करे।
कुहर्या आखे दुर मटाय मां आकड़ायता फीरे;
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.