Bhilali Bible
भजन सहीता 149
ईस्रायल माणसे भगवानेन बड़ाय करु
हालेलुया कय्न यहोवा भगवानेन बड़ाय करु!
यहोवा भगवान वाटे एक नवलो गीत गावु;
ने तेरे पर भुरसु करन्यान मंडळी मां तेरी बड़ाय करु।
ईस्रायली माणसे, तीना भगवानेन साहरे खुस हवणु चाहजे, जु तीनुक घड़्यु;
सीयोन राजवाड़ान माणसे आपसा राजान साहरे गखळायणु चाहजे।
चे नाच्ता जाय्न तेर नावेन बड़ाय करनु चाहजे,
ने डुमेकड़ी ने झुणगु वाजाड़ीन तेरा गुण गावणु चाहजे।
काहाकी यहोवा भगवान आपसा माणसे पर खुस रवे;
चु नीचळा माणसे काजे छुटकारान ने जीतेन पागड़ी पेहरावसे।
यहोवा भगवानेन भुरसु करन्या, माणसे सेक-सींगारेन वजे सी खुस हवणु चाहजे;
चे आपसा गुदड़ा पर पड़्या-पड़्या बी खुसीन गीत गावणु चाहजे।
तींद्रा गळाम सी भगवानेन बड़ाय करनु चाहजे,
ने तींद्रा हात मां दुय धार्या तलवार्या बी रवणु चाहजे।
हेरेन करीन की चे आड़जात्या माणसे सी बदलु ली सके,
ने राज राजेन माणसे काजे डंड आपे सके,
ने तींद्रा राजा काजे साकळ सी बांद देय,
ने तींद्रा धाक जमाड़न्या पुडार्याक लुहड़ान हातकड़्या पेहरावे;
ने भगवानेन साहरे लिखला नक्खी करलु डंड तीनुक आपे!
तेरेसी भगवानेन पर भुरसु करन्याक ईज्जत जड़से।
हालेलुया कय्न यहोवा भगवानेन बड़ाय करु!
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.