Bhilali Bible
भजन सहीता 148
आखी कळजुग भगवानेन बड़ाय करे
हालेलुया कय्न यहोवा भगवानेन बड़ाय करु!
सरगेम रवण्या यहोवा भगवानेन बड़ाय करु,
उचला सरगेम सी तेरी बड़ाय करु!
ए तेरा सरगेवाळा आखा चाकर्या, तेरी बड़ाय करु;
ए तेरा सरगेवाळा सीपायड़ान आखा मेळा तेरी बड़ाय करु!
ए चांद-सुरीमल, तेरी बड़ाय करु;
ए भबळन्या आखा तारा, तेरी बड़ाय करु।
ए आखाम सी उचा सरग, ने ए सरग मां रवण्या पाणी,
तुहुं दुयु तेरी बड़ाय करु!
जे आखा यहोवा भगवानेन नावेन गुण गावु,
काहाकी जे आखा तेरेत हुकुमे उबजाड़लु छे।
ने चु तीनुक जलम टेकला रवणे करीन उबजाड़ीन मेल रयु;
ने चु तींद्रे वाटे जे कायदा बणावलु छे, चे कदी नी टळे।
धरती पर रवण्या आखा यहोवा भगवानेन बड़ाय करु,
ए पाणीम रवण्या जानवर्या ने उंडला समुदर तुहुंं बी भगवानेन बड़ाय करु।
ए आक्ठान तसी ईजळी ने गार, ए बरफ ने कुळ्ळा साय वादळा,
ए तेरी वात मान्ने वाळी वाहळी ने आंजी; तुहुं बी यहोवा भगवानेन बड़ाय करु!
ए बयड़ा ने बयड़ी; ए फळवाळा झाड़का ने देवदार नावेन झाड़का;
तुहुंं बी यहोवा भगवानेन बड़ाय करु।
ए बयड़ाम रवण्या जनवार्या, ए घर-पाळन्या जनवार्या, ए घीसड़ाय्न चालन्या जनवार्या ने चिरला;
तुहुं बी यहोवा भगवानेन बड़ाय करु।
ए धरतीन आखा राजा ने आखा राजवाड़ान माणसे,
ए धरतीन आखा राज-करन्या ने नीयाव-करन्या; तुहुं बी यहोवा भगवानेन बड़ाय करु।
ए आखा जुवान्या पुर्या-पुरायटा, ए आखा डाहला ने आखा पुर्या-पारी;
तुहुंं बी यहोवा भगवानेन बड़ाय करु।
जे आखा यहोवा भगवानेन नावेन गुण गावणु चाहजे,
काहाकी तेरोत नाव जुरभर्यो छे;
हेरो सेक-सींगार धरती ने सरगेन उपर छे।
यहोवा भगवान आपसा असामी वाटे एक सींगड़ो उचो करलु छे;
जो सींगड़ों ते तेरे साते रवण्या ईस्रायली माणसे वाटे,
ने आखा भक्ती करन्या माणसे वाटे बड़ाय करनेन बाराम छे।
हालेलुया कय्न यहोवा भगवानेन बड़ाय करु!
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.