Bhilali Bible
भजन सहीता 147
आखाम सी ताकतवाळा भगवानेन बड़ाय करु
हालेलुया कय्न यहोवा भगवानेन बड़ाय करु!
ए सरगेम रवण्या, तुहुं आखा यहोवा भगवानेन बड़ाय करु;
उचला सरगेम सी तेरी बड़ाय करु।
यहोवा भगवान ते ईस्रायली जातीन खळवायला माणसेक भेळा करने बाजी रयु,
ने यरुसलेम सहर काजे आपसा माणसेन साहरे पछु बसाड़ने बाजी रयु।
यहोवा भगवान ते दुखी माणसेक सांती आपे,
ने तींद्रा घाव पर मलम लागाड़ीन पट्टी बांदे।
चु सरगेन तारा काजे गीणे,
ने एकेक काजे नाव लीन बुलावे।
आपणु मालीक जुरभर्यु, ने बेसकु ताकुतवाळु छे;
तेरी अकल ते छेव नी लेवाये अतरी छे।
यहोवा भगवान ते, नीचळा माणसेन सात देय;
बाकुन पापी माणसे काजे भुयमां आसटी देय।
यहोवा भगवाने काजे बेसकु वारु कवता जाय्न तेरा गीत गावु,
झुणगु वाजाड़ी-वाजाड़ीन आपणा भगवानेन भजन गावु;
यहोवा भगवान सरगेम वादळो छावाड़ देय,
ने तेरेम सी पाणीन सेरा पाड़े,
ने बयड़ा पर चारु उंगाड़े।
यहोवा भगवान जनवार्या काजे चारु आपे,
ने कागळान पीलाक बी खाणो आपे, जे कांव-कांव करे।
घुल्लान ताकुत पर भुरसु करन्या पर खुस नी हवे,
ने डखी माणसेन पाये सी बी खुस नी हवे;
बाकुन चु तींद्रेत पर खुस हवे, जे तेरो बीहाणो माने,
मतलब हेरेसी जे तेरी दयान आस लागाड़ीन रवे।
ए यरुसलेम सहर, यहोवा भगवानेन बड़ाय कर! ए सीयोन मां रवण्या,
यहोवा भगवानेन बड़ाय करु!
काहाकी यहोवा भगवान तारा बारनान कब्जाक काठा करलु छे,
ने तेरा पुर्या काजे संयबरकत आपलु छे।
यहोवा भगवान तुंद्रा देसेम सुक-सांती आपे,
ने तुंहुक वारु-वारु गहुं पाकाड़ीन आफराड़ रयु।
यहोवा भगवान आपसु हुकुम धरती पर मकले,
ने तेरा हुकुमेन बुल धरती पर बेसका जुरे दवड़ीन आवे।
चु गाडरान कान्या काजे बरफ सांय पाड़े,
ने वाहळाम उडण्या रखड़ान तसु उस्टो पाड़े।
चु उराट्ला काकरान तसु गार पाड़े,
तीनु गारेन सेळ्ळान काहनाक काजे सेण कराये काय?
चु हुकुम आपीन गारेक गळाड़े;
चु कवे अतरुत वाहळो चालने बाजी जाय, ने पाणी उहणे बाजी जाय।
यहोवा भगवान याकुबेयान अवल्यात काजे आपसो नेम सीकाड़े,
ने ईस्रायल काजे आपसान नेम-कायदा देखाड़े।
चु काहना बी आड़जात्या काजे आपसा कायदा नी सीकाड़्यु;
तेरेमां आड़जात्या माणसे तेरा कायदा नी जाणता।
हालेलुया कय्न यहोवा भगवानेन बड़ाय करु!
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.