Bhilali Bible
भजन सहीता 146
छुटकारु आपण्या भगवानेन बड़ाय
हालेलुया कय्न यहोवा भगवानेन बड़ाय करु!
ए मारा मन, यहोवा भगवानेन बड़ाय कर।
जत्यार लग मे जीवीस, तत्यार लग यहोवा भगवानेन बड़ाय कर्या करीस;
मे जत्यार लग नी मरो, तत्यार लग भगवानेन गुण गाया करीस।
तुहुं मुख्या पर भुरसु घुण करु, ने नी काहलाक माणसे पर,
काहाकी हेरेमां छुटकारु करनेन बी सक्ती नी हय।
एक दाहड़े तींद्रु बी जीव नीकळी जासे, ने तींद्रो डील बी धुळा मां भेसकाय जासे;
ने तीनेत दाहड़े तेरी बणावली आखी युजना सर जासे।
काय वारु छे चु, तेरु मदत करन्यु याकुब्यान यहोवा भगवान छे,
ने तेरु भुरसु आपणा भगवान यहोवा पर छे।
यहोवा भगवान ते सरग ने धरती ने दर्या समुदर काजे बणायु,
ने तेरेम जो काय छे, चो आखो हीयुत बणायु;
ने चु वायदु जलम पुरु करन्यु छे।1
यहोवा भगवान ते वेला पाड़ायलाक नीयाव आपाड़े;
ने भुकला काजे खाणो आपे,
ने कुंडवाड़ाम कुंडायलाक छुड़ावे।
यहोवा भगवान आंदळा माणसेन डुळा उगाड़ देय।
यहोवा भगवान हदस खादला काजे सांती आपीन हिम्मत वदाड़े;
यहोवा भगवान धरमी माणसेक परम करे।
यहोवा भगवान दीसरा देस वाळान राखवाळी करे;
ने पुरायला ने रांडायलान ते राखवाळी करे;
बाकुन कुहर्यान वाट काजे आकी-टेड़ी कर देय।
यहोवा भगवान जलमकु राज करतु रवसे।
ए सीयोन, राजवाड़ा तारु भगवान पीड़ी-डीट राज करतु रवसे,
हालेलुया कय्न यहोवा भगवानेन बड़ाय करु!
Source notes (1)
- Cross-reference नेवताळान काम 4:24; 14:15
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.