Bhilali Bible
भजन सहीता 145
भगवानेन भलाय्न बड़ाय
भगवानेन बड़ाय वाटे दावुदेन भजन
ए मारा भगवान, ए मारा राजा, मे तुसेक नावलीया करीस,
ने जलम तार नाव काजे बेसकु वारु कवतु रय्स।
मे दाहड़ीन तार नाव काजे बेसकु वारु कवतु रय्स;
ने मे जलम तारी बड़ाय करतु रय्स।
ए यहोवा भगवान ते जुरभर्यु,
ने बेसकी बड़ाय करे असु छे, तारा गुण छेव नी लेवाये असा छे।
माणसे, पीड़ी-डीट आवती पीड़ी काजे, तारा छेल-भात्या कामेन बाराम कय्न मटाय करसे,
तारा चकराड़न्या बेसका कामेन बारामां कवता रवसे।
मे तार उचा नावेन सेक-सींगारेन सेक पर,
ने भाती भातीन चकराड़न्या बेसका-काम पर मन लागाड़ीस।
माणसे तारा बीहे असा कामेन ताकतेन बारामां कवसे,
ने मे बी, तारा मटा-मटा कामेन बारामां कह्या करीस।
माणसे, तु भलो करलु चो हेर कराय्न तारी बड़ाय करसे,
चे तारा धरमेन साहरे खुसीन गीत गावसे।
यहोवा भगवान दयाळु ने गीणाळु छे;
चु धीरु रयन रीसवायणे वाळु, ने बेसकु दया करन्यु छे।
यहोवा भगवान आखा वाटे भलाय करन्यु छे,
ने तेरी दया आखी कळी पर छे। हेरेत साहरे आखी कळी बणावली छे।
ए यहोवा भगवान, तारी आखी कळी पर तुसेक बेसकु वारु कवसे;
ने तारे पर भुरसु करन्या माणसे तुसेक वारु कवसे।
चे तारा राजेन सेकेन बारामां देखाड़से,
ने चे तारी ताकुतेन बारामां वात कर्या कवसे।
तेरेसी चे अदम्या, आखा माणसे अगळ,
तारा राजेन सेक-सींगारेन ने तारा जुरभर्या काम उजेंता करे।
ए यहोवा भगवान, तारो राज जलम टेकलो रवसे,
ने तारु सेक ने धाक पीड़ी-डीट टेकलु रवसे।
यहोवा भगवान ते पड़तेला माणसेक टेकु आपे,
ने जे हदस खाय रया, तीनुक सांती आपीन हिम्मत बड़ावे।
ए यहोवा भगवान, तुत आखाक टेमे-टेमे पर खाणो आपे,
ने आखा माणसे तारीत वाट देखीन तळफ्या करे।
ए यहोवा भगवान तु आखा जीवतेलाक पुसाटीन आपे,
ने खाणो खावाड़ीन आफराड़ी देय।
यहोवा भगवान ते, आपसा आखा वेहवार मां धरमी छे,
ने आपसा आखा काम मां दया देखाड़न्यु छे।
जतरा यहोवा भगवान धड़े दुवा करे, जे खरले मने,
तेर धड़े दुवा करे, हीनु आखा पुठे चु रवे।
यहोवा भगवान तेरो बीहाणो मान्यान मरजी पुरी करे,
ने तींद्री दुवा सामळीन तीनुक छुड़ावे।
जे यहोवा भगवान सी परम करे, तींद्री चु राखवाळी करे,
बाकुन चु आखा कुहर्याक खत्तम करसे।
मे यहोवा भगवानेन मारा मुंहडा सी सदा गुण गाया करीस;
ने आखा जीवतेला तेरा चुखला नाव काजे जलम वारु कवता रवे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.