Bhilali Bible
भजन सहीता 144
राजु जीत वाटे भगवान काजे बेसकु वारु कह्यु
दावुदेन गीत
यहोवा भगवान मारु आडु आवण्यु चापर्यु छे, चु ते मारा हातेक लड़ाय करनेन हुनर सीकाड़े,
ने मारा आंगळ्या काजे बीलखा देणे सीकाड़े।
तेरेसी मे तीनाक वारु कहो।
यहोवा भगवान मार वाटे दया करन्यु छे,
ने कीलान अवारकुट सांय छे, ने चु मार वाटे आसरान कीलु,
ने छुड़ावण्यु छे। चु मारी आड़-आवणी ढाळ छे,
चु राज्य-राज्येन माणसेक मारा हक मां कर देय।
ए यहोवा भगवान, माणुस कुण छे, तेरे पर तु मन लागाड़े?
ने माणसेन जाती कुण छे, तेरी तु फीकुर करे?1
माणुस ते वाहळी सांय छे,
माणसेन जीवाय्न दाहड़ा ते, ढळतेला साहळान तसा छे।
ए यहोवा भगवान, तु सरग काजे नेचु करीन उतरी आव;
ने बयड़ा काजे टुचल, तत्यार हींद्रेम सी कुळ्ळु नीकळसे।
ईजळी भबळावीन मारा वेरीक रावण्या-तीवण्या कर दे,
ने तारी ईजळीन बीलखा दीन तीनुक घाबराड़ दे।
उचला सरगेम सी तारु हात,
लांबु करीन मेसेक उंड्ला दरीयाम सी बचाड़ ले,
ने दीसरा देस वाळा सी मेसेक बचाड़ ले।
हींद्रा मुंहडाम सी ते झुटी वात नीकळे,
ने हींद्रु जेवड़्यु हात ते धुकु देण्यु छे।
ए यहोवा भगवान, मे तार वाटे एक नवलो गीत गाय्स;
मे दस तारवाळु झुणगु वाजाड़ीन तारो भजन गाय्स।
तु राजान छुटकारु आपण्यु छे,
तु तारा चाकर्या दावुद काजे तलवार सी बचाड़न्यु छे।
मेसेक दीसरा देस वाळान हात सी बचाड़ ले,
ने तींद्रा मुंहडाम सी झुटी वात नीकळे,
ने तींद्रु जेवड़्यु हात ते धुकु देण्यु छे।
हामरा जुवान्या पुर्या
वदण्या झाड़कान तसा हवणु चाहजे,
ने हामरी पुरे हवेली मां सींगार करला,
खाम्बान तसा हवणु चाहजे।
जत्यार हामरा कणग्याम दाणा,
भरला रवणु चाहजे,
ने हामरा गाडरा, ने बुकड़ा खयड़ा मां हजारु-हजारु पीला
ने गीदल्या जणनु चाहजे।
हामरा बेल भार खीचसे, दीवाल उदार नाखसे,
कुई बी बन्दी नी बणावे,
हामरा फळ्या मां पर रड़नु-कलपणु नी हवणु चाहजे।
जे माणसे असात वारु रवता हय, चे बरकत वाळा छे।
तीनु माणसेन भगवान यहोवा छे, चे बेसका बरकत वाळा छे!
Source notes (1)
- Cross-reference अय्युब 7:17,18; भजन सहीता 8:4
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.