Bhilali Bible
भजन सहीता 143
छुटकारा वाटे दुवा
दावुदेन मीसमर भजन
ए यहोवा भगवान, मारी दुवा सामळ,
ने मारा लीलघायणा पर धीयान दे: तु खरलु ने धरमी छे,
हेरसी मारी दुवा सामळी ले,
ए यहोवा भगवान, मे ते तारु चाकर्यु छे, मार वीरुद मां नीयावेन तारीक मां लागाड़े;
तारी नींगा मां ते कुय बी धरमी नी हय।1
वेरी ते मारा जीव काजे मुल लेणे हेर र्या;
चु मेसेक छेंदी-छेंदीन धुळा मां भेसकी देदु,
ने मेसेक बेसका दाहड़ान मरलान तसु,
आंदारला जागा मां नाख देदु।
मारु जीव मांह्ये की माह्ये घाबराय रयु:
ने मारो मन दुखी हंय रयो।
मेसेक पेहला दाहड़ा हेर आवे,
मे तारा आखा छेल-भात्या काम पर मन लागाड़ो,
ने तारा आखा काम पर वीच्यार करो।
मे मारा हात पाखराय्न तार धड़े दुवा करो:
सुकली जागान तसु मारु जीव तारु पीसलु छे।
ए यहोवा भगवान, छाटुस मारी सामळी ले;
काहाकी मारु जीव माहये की माह्ये घाबराय रयु।
तु मार सी तारो मुंहडो मां डुकाड़े,
कांखुर माय्न मे मसाण मां गाड़ला माणसे मां भेसकाय जाय्स।
ए यहोवा भगवान, मे ते तारेत पर भुरसु करो; हेरेसी तु मेसेक संदारे-संदारे, तारी दया ने परमेन वात सामळाव।
मे ते, मारो मन तार भीणी लागाड़ो;
अळतेन मेसेक तीनीत वाटेन सीकापण आप,
तीने वाट्ये मेसेक चालनु चाहजे।
ए यहोवा भगवान, मेसेक मारा वेरीन हातेम सी बचाड़ ले;
ने तु मेसेक तारेत आसरे ली ले।
तु ते मारु भगवान छे,
हेरेसी मेसेक तारी मरजीन साहरे चालने सीकाड़।
तु तारा भलास्या जीव-आत्मान साहरे, मेसेक धरमेन जागा मां ली जा।
ए यहोवा भगवान, मेसेक तार नावेन अनसारे जीवतेलु रवणी दे।
तु जु धरमी छे, मेसेक गराम सी छुड़ाय ले।
मे ते तारु चाकर्यु छे; तेरेसी तारी दया,
ने परमेन साहरे मारा वेरीक मार नाख;
ने मारा जीवेक वेला पाड़न्या वेरीक सार दे।
Source notes (1)
- Cross-reference रोमीयो 3:20; गलातीयो 2:16
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.