Bhilali Bible
भजन सहीता 142
मदत वाटे दुवा
दावुदेन मस्कील, जत्यार चु गुफा मां हतलु: दुवा
मे यहोवा भगवान सी दुवा करो;
मे मालीक सी लीलघायो।
मे आपणा दुखेन वाते हेरसी खुलीन कह्वो,
मे आपणा आफत हेरे अगळ देखाड़े।
जत्यार मे तीने वाटे चालो,
तीनेत वाटे वेरी फांद मेक रया,
जत्यार मारु जीव माहें-माहें दुखी हवणे बाजी गुयलु,
तत्यारुत मारी हालत तुसे काजे मालुम हंय गुयली।
मे जेवड़्ये आंग्ये देख्यु,
बाकुन कुय मेसेक नी देखे।
मारे वाटे आसरु कांखुर नी रह्यु,
नी मेसेक काजे कुय पुछे।
ए यहोवा भगवान, मे तारे सी दुवा कर्यु;
मे कह्यु, तु मारु आसरु छे,
मारा जीवीस चां लग तु मारु हीस्सु छे।
मे आयड़ो ती तु धीयान दीन सामळ,
काहाकी मे ते बेसकु दुखी हंय रयु,
ज्य मारे पछळ पड़े, हींद्रे मां सी मेसेक बचाड़ लेय;
काहाकी चे मारे सी जादा ताकुतवाळा छे।
मेसेक खाडाम सी नीकाळ ले,
मे तारा नाव काजे बेसकु वारु कह्वो।
धरमी माणसे मारे च्यारु-मेर आवसे; काहाकी तु मारो मदत करसी।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.