Bhilali Bible
भजन सहीता 141
सांती वेळाय दुवा करनु
दावुदेन गीत
ए यहोवा भगवान, मे तुसेक आयड़्यु; छाटुत आय्न मारी मदत कर!
जत्यार मे तुसेत काजे आयड़ो, तत्यारुत मार भीणी कांटा लागाड़।
मारी दुवा तारे अगळ वारु गंदायण्या धुपेन तसी रवणु चाहजे,
ने मे हात उचा करो, ती असो लागणु चाहजे जसी सांती वेळाय चहड़ावली बादा हय।1
ए यहोवा भगवान, मारा मुंहडा पर कब्जु करने पेहरु बसाड़;
मारा हुटड़ान बारनान पर राखवाळ्या मेल।
मारा मने काजे काहनी बी भुंडी वात भीणी मां वळनी देय;
कुहर्यान सात-संगती सी, मेसेक बचाड़ीन राखजी,
ने नी मे तींद्रा सवादला खाणाम सी काय खाणे आपे।
धरमी मेसेक मारसे, ती तेरो देणु मे दया ने परम समजो, ने तेरो लड़नु मार वाटे मुणका पर रेचवला संयबरकतेन तेल सांय रवसे;
मारो मुणको ईनी वातेन नीकारु नी करनु चाहजे। बाकुन कुहर्या फालतु काम करसे, ती मे तींद्रा खुड़ला कामेन वीरुद मां दुवा करतु रय्स।
जत्यार हींद्रा नीयाव करन्या चापर्या धड़े हीट-पाड़्या,
तत्यार चे मारा बुल सामळी लेदा; काहाकी चे गुळ्या छे।
चे कवसे, जसा की काहनास हळ गेरीन धरती मां सी ढेकळा नीकाळ देय,
तसात हामरा हाटका बी मसाण मां पड़ी रवसे।
बाकुन ए यहोवा भगवान, मारा डुळा तारेत भीणी लागला छे;
मे तारेत आसरे छे,
तु मारा जीव काजे जाणी मां देय।
मेसेक हीना फांदा सी, ज्य चे मारे वाटे लागाड़्यु,
ने कुहर्यान जाळे मां सी मेसेक बचाड़।
कुहर्या माणसे आपणा जाळ मां आपसात जाळे मां फांदाय जासे,
ने मे बची नीकळो।
Source notes (1)
- Cross-reference उजेंता बुले 5:8
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.