Bhilali Bible
भजन सहीता 140
राखवाळी वाटे दुवा
गावण्यान डाहला वाटे दावुदेन मीसमर भजन
ए यहोवा भगवान, मेसेक कुहर्या माणसे सी बचाड़;
ने खुन-खराबु करन्या माणसे सी मेसेक बचाड़।
काहाकी चे ते आपसा मन मां कुहराय करनेन युजना बणावे,
ने दाहड़ीन लड़ाय-झगड़ु कर्या करे।
चे बुले ती असो लागे की, तींद्री जीप घड़सान तसी जहर वाळी छे;
तींद्रा हुटड़ा तळे नागेन जहर छे।1
ए यहोवा भगवान, भगवान मेसेक कुहर्या माणसेन हातेम सी बचाड़,
ने खुन-खराबु करन्या सी बचाड़,
जे मार पछळ पड़ीन मारनेन मुजगी कर रया।
मटाय करन्या माणसे मेसेक,
पाड़ने करीन पारद्यान तसा दुयड़ान फांद मेल रया;
चे मार वाटे वाट धड़्ये सुमटान जाळ आथरी रया।
ए यहोवा भगवान, मे तुसेत काजे कवो: तुत मारु भगवान छे।
ए यहोवा भगवान, मारी लीलघाय सामळी ले।
ए मालीक यहोवा, तु ते मारु ताकतवाळु छुटकारु आपण्यु छे,
तु लड़ाय्न दाहड़े तु मारा मुणकाक लुहड़ान टुपान तसु राखवाळी कर्यु।
ए यहोवा भगवान, तीनु जम माणसेन हर पुरी घुण हवणे देय, ने तींद्री कुहरली युजना पुरी घुण हवणे देय।
तींद्री हर पुरी करसी, ती ते चे वदु मटाय करने बाजी जासे।
जे माणसे मेसेक घेरवे,
तीनु कुहर्यात काजे नड़नु चाहजे।
तींद्रा मुणका पर हळो-हळो करतेला ईंगाळा पड़नु चाहजे;
तीनुक असला आक्ठान कुंडाम नाख देणु चाहजे, जां सी काहनाक काजे बी, नी नीकळाये।
लुच्चाई मेकण्याक देसेम रवायणु नी चाहजे,
खुनी माणसेन कुहराय, तीनुत काजे नड़नु चाहजे।
ए यहोवा भगवान, मे जाणो की, तु वेला पाड़ायला माणसेन वगे वळीन नीयाव करसी।
ने गरीब काजे बी नीयाव आपाड़सी।
छाचलीन धरमी माणसे तार नावेन गुण गाया करसे,
ने खरला माणसे तार अगळ रया करसे।
Source notes (1)
- Cross-reference रोमीयो 3:13
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.