Bhilali Bible
भजन सहीता 139
भगवान आखो जाणे ने तेरी हजरी आखे जागे रवे
गावण्यान डाहला वाटे दावुदेन मीसमर भजन
ए यहोवा भगवान, तु ते मेसेक उंडे सी पारखी लेदु। ने मार बारामां जाण लेदु।
तु मारो उठणु-बसणु जाणे; मारा मन मां जे वीच्यार आवे,
चे बी तु लांबे रय्न जाण लेय।
मारो हींडणु-फीरनु ने सुवणु बी तु जाणे,
मारु आखु वेहवार तु उंडे रीते जाणे।
मेसेक बुलनेन पेहेल तु जाणे की,
मे काय-काय बुलने वाळु छे।
तु मारे च्यारुमेर सी गुवाळी कर रयु,
तु तारे जुरभर्या हात सी मारी राखवाळी कर रयु।
जी आखी माहती मेसेक चकराड़ देय;
जी ते बेसकी उंडी ने समज नी आवे असी छे।
मे तारी हजरी सी छेटु हंय सको काय?
नी तारु जीव-आत्मा ते आखे दुर हजुर रवे।
भले, मे सरगेम चहड़ जाम, तेबी तु चां छे;
ने भले मे पाताळ मां बी गुदड़ो आथरी लम, तेबी तु चां छे।
भले मे संदारे उंगण्या दाहड़ान रसण पर बसीन उडी जाम,
ने दर्या-समुदरेन पली पार जाय्न वस जाम,
तेबी चां तारु हात, मारी अगवाय करसे,
ने तारु जेवड़्यु हात मेसेक धर रवसे।
भले मे कहो, “मारे च्यारे मेर वाळो वीजाळो,
रातेन तसो आंदारो हंय जाणु चाहजे।” ने कदी असो हंय बी जाय;
तेबी ए यहोवा भगवान! आंदारला मां बी, मे तारी नींगाम सी नी साताय सको,
ने रात बी तार वाटे दीसुन तसो वीजाळो रवसे;
तार वाटे ते आंदारलो ने वीजाळो दुयु एक सारको छे।
तु ते मारा पेटेन मांहे वाळा आंग घड़लु छे,
तु मेसेक मारी माय्न कुख मां घड़लु छे।
मे ते तारे हाते छेल-भात्यु ने बेसकु वारु घड़ायलु छे; हेरेसी मे तुसेक बीहतु जाय्न बेसकु वारु कय्स;
तारा काम ते चकराड़े असा बेसका-वारु छे,
ने मारो मन, जी वात वारु रीते जाणे।
जत्यार तु मेसेक सातायला जागा मां घड़तेलु,
तु मेसेक माय्न कुख मां वारु रीते घड़तेलु,
ती मारु आखु सीकु तार अगळ पेहलेन चुखोझण देखायतेलो।
तारा डुळा, मारा वीन-घात्या डीलेक देख्या;
ने मेसेक घड़ायणेन पेहेल मार वाटे जे दाहड़ा तु टाकलु,
चे आखा दाहड़ा तारी किताप मां लिखला हतला।
ए यहोवा भगवान, तारा वीच्यार मार वाटे बेसका महंग्ला छे!
चे वीच्यार ते बेसका छे।
भले मे तीनुक गीन्ने करीस, तेबी चे गीणाये नी, चे वीच्यार ते बालु रेतळान काकरा सी बी वदु छे।
जत्यार मे, सुय्न जागी जाम, तत्यार बी मारा वीच्यारेन उत्तर तुत रवे।
ए भगवान, तु कुहर्याक मार नाखतु, ती बेसकु वारु रवतु;
खुनी माणसेक, मारेन्चां सी छेटा कर देतु, ती बेसको वारु रवतो!
चे ते तार वीरुद मां कुहराय्न वात करे;
तारा वेरी फालतुत तारो नाव लेय।
ए यहोवा भगवान, जे तार भीणी रीस करे, तींद्रे भीणी मे रीस नी करो काय?
ने जे तारी वीरुद करे, तींद्रे भीणी खर नी करो काय?
हव मे तींद्रे भीणी बेसकी रीस ने खर करो;
तीनुक ते मे बी वेरी समजो।
ए यहोवा भगवान, मेसेक पारखीन जाण ले!
मेसेक पारखीन मारी फीकुर काजे जाण ले!
ने देख मार मां काहीस गलत वात हंय की नी हय,
ने जलमेन वाट्ये मारी अगवाय कर।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.