Bhilali Bible
भजन सहीता 138
वायदु पुरु करन्या भगवानेन बड़ाय
दावुदेन भजन
ए यहोवा भगवान, मे आखा मन तुसेक बेसकु वारु कय्स;
देवता अगळ बी, मे तारा गुण गाय्स।
तु ते आपसु वायदु पुरु करने मां अंजाण्यु छे;
हंय बी तु मार वाटे वायदु पुरु करीन वदु अंजाण्यु बण रयु।
हेरेसी मे तारा चुखला मंदीर भीणी फीरीन, तुसेक वांदीस।
ने मे, तारी दया ने परम ने तारी खराय्न साहरे, तुसेक बेसकु वारु कय्न नावलीस।
तीने दाहड़े मे दुवा कर्यु, तीनेत दाहड़े, तु जपाप आप्यु;
ने तु मेसेक ताकत आपीन मारी हिम्मत वदाड़्यु।
ए यहोवा भगवान, धरतीन आखा राजा, तारी वात सामळी रया,
हेरेसी चे तुसेक बेसकु वारु कय्न, तारा गुण गावसे;
ए यहोवा भगवान तारु सेक-सींगार ते जलम छे;
हेरेसी चे राजा तारा छेल-भात्या कामेन साहरे गीते गावसे।
यहोवा भगवान ते, आखाम उचे रवण्यु छे,
तेबी चु नीचळा माणसेन धीयान राखे;
बाकुन चु मटाय करन्याक उळखीन छेटु हंय जाय।
भले मे गरा मां रवो, तेबी तु मारा जीवेन राखवाळी करसी;
भले मारा वेरी मार पर रीसवाय पड़े,
तेबी तु मेसेक तींद्रा हातेम सी आपसे जेवड़्ये हाते छुड़ावसी,
ने तीनुक डंड आपसी।
ए यहोवा भगवान, तु ते मार वाटे आखो कांय पुरो करन्यु छे;
तारी दया ने परम ते, जलमको रवे।
ए यहोवा भगवान, आपसान हात सी घड़ला असामीक घुण छुड़े।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.