भजन सहीता 137

जेल मां सी ईस्‌रायल माणसेन दुखेन गीत

1हामु हीना बेबीलोन देसेन नदी धड़्‌ये बस्‌या करत्‌ला,

ने उजेड़ला सीयोन सहरेन हेर करीन रड़्‌या करतेला।

2हेरे ईचमां मजनु झाड़का पर,

हामु आपणी वीणा काजे टांगी देदा;

3काहाकी जे हामु काजे बांदीन ली गुयला, चे वां हामरे सी गीत गाड़ने चाह्‌या,

ने हामरा रड़ावणे वाळा हामरे सी खुसी चाहीन कह्‌या,

सीयोनेन गीते मां सी हामरे वाटे कुय गीत गावु!

4हामु यहोवा भगवानेन गीत काजे पारका देस मां हींद्‌रे अगळ,

कसा गाय सकजे।

5ए यरुसलेम सहर, कदी मे तुसेक ईसरी जायस,

ती मारु जेवड़्‌यु हात सुकी जासे!

6ए यरुसलेम सहर, कांखुर माय्‌न, मे तारी भलाय करनेन हर करने रहणीदीन,

जां जड़ने वाळी वारलु मजान हेरु पड़ जाम,

ती ते मारी जीप ताळवेत चस्‌टी जाणु चाहजे।

7ए यहोवा भगवान, यरुसलेमेन दुखेन दाहड़ाक हेर कर,

तीने दाहड़े एदोम्‌या

माणसे हींद्‌री सात दीन, असा कवतेला:

यरुसलेम सहरेन भीतड़ान नेहु लग उदार देवु!

8ए बेबीलोन सहरेन माणसे, तुहुं ते सींगारली जुवानाय तसा छे,

तुहुं ते हामरा सहरेक उजाड़ीत देदा, हामरे साते तुहुं बेसकु भुंडु वेहवार करला छे,

तेरेमां हीना वेहवारेन जु काहनुक बदलु लेसे, चु बेसकु बरकतवाळु कह्‌वायसे।1

9तुंद्‌रा पुर्‌या-पारीक धरीन चापर्‌या पर आसटीन मार नाखसे,

चु बेसकु बरकतवाळु कवायसे।