Bhilali Bible
भजन सहीता 136
बेसको वारु गीत
यहोवा भगवान काजे बेसकु वारु कवु, काहाकी चु भुळु छे, तेरी बड़ाय करु।
तेरी दया ने परम, जलमको रवे।1
जु भगवान, देवता कवायण्या आखाम सी मटु छे, तेरी बड़ाय करु,
तेरी दया ने परम, जलमको रवे।
जु भगवान, मालीक कवायण्या आखा सी जुरभर्यु छे, तेरी बड़ाय करु,
तेरी दया ने परम, जलमको रवे।
आपणु भगवान अतरुत, मटा-मटा काम करे, हेरेसी तेरीत बड़ाय करु;
तेरी दया ने परम, जलमको रवे।
जु आपसे अकले सरग उबजाड़्यु, तेरीत बड़ाय करु,
तेरी दया ने परम, जलमको रवे।2
जु धरती काजे पाणीम सी उबजाड़ीन, पाणीत पर आथरी देदु। तेरीत बड़ाय करु,
तेरी दया ने परम, जलमको रवे।3
जु, मटलो वीजाळो आपण्या उबजाड़्यु, तेरीत बड़ाय करु;
तेरी दया ने परम, जलमको रवे
जु, दीसु वीजाळो आपणे करीन दाहड़ु उबजाड़्यु,
तेरीत बड़ाय करु, तेरी दया ने परम, जलमको रवे।
जु, राती वीजाळो आपणे करीन चांद उबजाड़्यु, तेरीत बड़ाय करु,
तेरी दया ने परम, जलमको रवे।4
जु, मीसर देसेन आखा पेहेल-खुळ्याक मार नाख्यु, तेरीत बड़ाय करु,
तेरी दया ने परम, जलमको रवे;5
जु, आपणा ईस्रायली माणसे काजे मीसर देस मां सी नीकाळ लायु,
तेरीत बड़ाय करु, तेरी दया ने परम, जलमको रवे।6
जु ताकत वाळु हात अघु करीन, तीनुक नीकाळ लायु, तेरीत बड़ाय करु,
तेरी दया ने परम जलमकी छे।
जु, रात्ला समुदरेन दुय हीस्सा कर देदु, तेरीत बड़ाय करु;
तेरी दया ने परम जलमकी छे।
जु ईस्रायली माणसे काजे तीनु दुय हीस्सान ईचमां माय्न छेकाड़ीन ली जात रयु, तेरीत बड़ाय करु;
तेरी दया ने परम जलमकी छे।
जु फीरोन राजा काजे ने तेरा सीपायड़ान टुळा काजे रात्ला समुदर मां आसटीन मार नाख्यु,
तेरीत बड़ाय करु, तेरी दया ने परम जलमकी छे;7
जु उजाड़्या बयड़ा मां आपसा असामीन अगवाय कर्यु,
तेरीत बड़ाय करु, तेरी दया ने परम जलमकी छे।
जु मटा-मटा राजाक मार नाख्यु, तेरीत बड़ाय करु,
तेरीत दया ने परम जलमकी छे।
जु जुरभर्या राजा काजे, मार नाख्यु, तेरीत बड़ाय करु,
तेरीत दया ने परम जलमकी छे।
जु एमोरी जातीन राजा सीहोन काजे मार नाख्यु, तेरीत बड़ाय करु,
तेरीत दया ने परम जलमकी छे।8
जु बासान मुलुकेन राजा ओग काजे मार नाख्यु,
तेरीत बड़ाय करु; तेरीत दया ने परम जलमकी छे।9
ने तीना राजान देस काजे जाहगीरी हवणे वाटे आप देदु;
छाचलीन तेरी दया ने परम, जलमकी छे।
आपसा चाकर्या ईस्रायली माणसेन हातेम जाहगीरी हवणे वाटे आप देदु;
छाचलीन तेरी दया ने परम जलमकी छे।
जु भगवान आपणी दुख मां आपणी हेर करीन मदत कर्यु;
तेरीत बड़ाय करु; छाचलीन, तेरी दया ने परम, जलमकी रवे।
जु आपणुकव आपणा वेरीन हातेम वेरीम सी छुड़ायु, तेरीत बड़ाय करु;
छाचलीन तेरी दया ने परम जलमकी रवे।
जु आखा जीव-जानवर्या काजे खाणो आपे, तेरीत बड़ाय करु;
छाचलीन, तेरी दया ने परम, जलमकी रवे
आपणु यहोवा भगवान, जु सरग मां रवे, तेरीत बड़ाय करु;
छाचलीन, तेरी दया ने परम, जलमकी रवे।
Source notes (9)
- Cross-reference 1 ईतीहास 16:34; 2 ईतीहास 5:13; 7:3; एज्रा 3:11; भजन सहीता 100:5; 106:1; 107:1; 118:1; यीरम्या 33:11
- Cross-reference उबजाणनी किताप 1:1
- Cross-reference उबजाणनी किताप 1:2
- Cross-reference उबजाणनी किताप 1:16
- Cross-reference नीरगमन 12:29
- Cross-reference नीरगमन 12:51
- Cross-reference नीरगमन 14:21-29
- Cross-reference गिन्ती 21:21-30
- Cross-reference गिन्ती 21:31-35
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.