Bhilali Bible
भजन सहीता 135
यहोवा भगवानेन बड़ायन गीत
यहोवा भगवानेन बड़ाय करु,
यहोवा भगवानेन नावेन बड़ाय करु, ए यहोवा भगवानेन पावर्या, तुहुंं बड़ाय करु,
तुहुंं जे यहोवा भगवानेन मंदीर मां,
मतलब हामरा भगवानेन मंदीरेन आंगणा मां उबा-उबा सेवा कर्या करु!
हालेलुया कय्न यहोवा भगवानेन बड़ाय करु, काहाकी चु भुळु छे!
वाजा-गाजा पुठे तेर नावेन गुण गावु, काहाकी च नाव गमे असो छे।
यहोवा भगवान ते याकुब्यान अवल्यात काजे आपसा वाटे नेवाड़लु छे;
ईस्रायली माणसेक जो मारो धन छे करीन नेवाड़ लेदलु छे।
मे ते पाक्कु जाणो की,
हामरु यहोवा भगवान आखा देवता सी बेसकु मटु छे।
यहोवा भगवान ते, सरग मां ने धरती पर,
ने समुदर मां, ने समुदर तळे,
जसो आपसाक चाहजे तसुत कर्यु।
यहोवा भगवान धरतीन खुणे सी वादळो उडाड़ीन लावे,
ने चु पाणीन सेरा वाटे ईजळी बणावे,
ने आपसा वाहळान कुठाम सी वाहळो छुड़े।
यहोवा भगवान ते, मीसर देसेन माणसेन पेहेल-खुळ्याक मार नाख्यु,
ने ढुरेन पेहेला केवड़ाक मार नाख्यु!
यहोवा भगवान ते मीसर देस मां बेसका वारु काम कर्यु। चु राजा फीरोन्या,
ने तेरा आखा चाकर्या अगळ चकराड़न्या वारु कामेन सहलाणी देखाड़्यु।
अळतेन चु बेसका आड़-जात्या माणसेक मार नाख्यु,
चु ते ताकतवाळा राजा काजे मार नाख्यु,
चे राजा जे छे: एमोरी जातीन राजु सीहोन,
ने बासान मुलुकेन राजु ओग।
असु करतु-करतु चु कनान देसेन आखा राजाक;
चु तींद्रो देस, आपसा माणसेन हक मां हवणे करीन,
आपसा असामी ईस्रायली माणसेन जाहगीरी हवणे करीन आप देदु।
ए यहोवा भगवान, तु जलमकु टेकलु रवसी।
ए यहोवा भगवान, माणसे तुसेक पीड़ी-डीट नावलीया करसे।
यहोवा भगवान ते, आपसा चाकर्या पर दया करसे;
चु आपसा असामी काजे नीयाव आपाड़से।
तीनु मुरत्याक आड़-जात्या पुजे,
चे मुरत्या ते माणसेन हात सी बणावला छे।
तीनु मुरत्यान मुंहडो ते रवे, बाकुन तीनुक बुलाये नी,
तीनु मुरत्यान डुळा ते रवे, बाकुन तीनुक देखाये नी,
तीनु मुरत्यान कांटा ते रवे, बाकुन तीनुक सामळाये नी,
तीनु मुरत्यान नाक ते रवे, बाकुन तीनुक दम नी लेवाये।
मुरत्या बणावणे वाळा, मुरत्यान तसा हंय जासे।
ने मुरत्या पर भुरसु करन्या बी, मुरत्यान तसा हंय जासे।1
ए ईस्रायली माणसेन घराणा, यहोवाक वारु कवु!
ए हारुन्यान घराणा, यहोवा काजे वारु कवु!
ए लेवीन घरन्या, यहोवा भगवान काजे वारु कव! ए यहोवा भगवानेक बीहण्या,
यहोवान डर राखण्या, यहोवा भगवान काजे वारु कवु!
यहोवा भगवान वारु छे,
जु यरुसलेम सहर मां सीयोन बयड़े मंदीर मां हजुर रवे।
हालेलुया कय्न यहोवा भगवानेन बड़ाय करु!
Source notes (1)
- Cross-reference भजन सहीता 115:4-8; उजेंता बुले 9:20
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.