भजन सहीता 129

ईस्‌रायली माणसेन वेरीक लाजे पड़ने वाटे दुवा

मंदीरेन तीरथ करनेन टेमे गावे चो गीत

1ईस्‌रायली जातीन माणसे हंय असा कवणु चाहजे, मे नान्‌लु हतलु,

ती सीत माणसे मेसेक अळी-अळीन दुख देता आय रया।

2मे नान्‌लु हतलु ती सीत चे मेसेक,

अळी-अळीन दुख देता आय र्‌या,

तेबी आपणु तीनुक जीतणे नी देदा।

3हळन्‌या माणसे मारा आसा उपर हळ गेर्‌या,

ने लांबा-लांबा रेकाटा खेच देदा।

4बाकुन यहोवा भगवान धरमी छे;

कुहर्‌या वेरी जे दुयड़ा आपणे बांदला, तीनु दुयड़ा सी छुड़ायु।

5जतरा वेरी, सीयोन वाळा भीणी रीस करे,

चे आखा लाजे पड़ीन ढास जाणु चाहजे!

6चे घरेन छत परुन उंगणया चारान तसा हंय जाणु चाहजे,

जो वदणेन पेहलुत सुक जाय;

7चु चारु नीते मुठेम आवे,

ने नीते पुळा बांधणे वाळु आपणा बाथेम धर सके,

8असला वेरी धड़े माय्‌न आवणे-जाणे वाळा असो लग नी कवे,

“यहोवा भगवानेन बरकत हात करनु चाहजे!

हामु तुहुंंक यहोवा भगवानेन नावे संयबरकत आपजे!”