Bhilali Bible
भजन सहीता 130
मदत वाटे दुवा
मंदीरेन तीरथ करनेन टेमे गावे चो गीत
ए यहोवा भगवान, मे हीड़ा-पीड़ान उंडला जागाम सी तुसेक आयड़ी रयु!
ए यहोवा भगवान, मारी सामळ!
तारा कांटा मारा लीलघायणु पर मन लागाड़!
ए यहोवा भगवान, कदी तु पापेन हीसाब लेतु,
ती कुण डंड सी बची सके?
बाकुन तु माफ करनेवाळु छे,
हेरेसी तारो बीहाणो मान्ने बाजी जाय।
मे यहोवा भगवानेन वाट देखो, मारु जीव हेरीत वाट देखे,
ने मारी आस हेरा बुल पर छे;
चोवकीदार, जतरा संदारान हर करे,
हव चोवकीदार जतरा संदारान हर करतु रवे,
हेरेसी बी अदु मारु जीव यहोवा भगवान काजे आपणा जीव सी वदुस मे चाहो।
ईस्रायली जातीन माणसे यहोवा भगवान पर आस लागाड़ीन रवे!
काहाकी यहोवा भगवान दया करनेवाळु,
ने आखा पाप सी छुटकारु आपणे वाळु छे।
हयुत ते ईस्रायली माणसे काजे,
तींद्रा आखा पापेम सी छुड़ावणे वाळु छे।1
Source notes (1)
- Cross-reference मत्ती 1:21; तीतुस 2:14
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.