Bhilali Bible
भजन सहीता 128
भगवानेन बीहाणो मान्ने वाळान बरकत
मंदीरेन तीरथ करनेन टेमे गावे चो गीत
बेसका बरकतवाळा छे चे आखा, जे यहोवा भगवानेन बीहाणो माने,
ने यहोवा भगवानेन वाट्ये चाले!
असु जीवसी ती, तारी मेहनतेन कमायलो तुत खाया करसी;
ने तु बरकतवाळु रवसी ने तारो वारलुत हवसे।
तारी घरवाळी तारा घर मां घुड़का दीन फळन्या अंगुरेन एलान तसी रवसे;
ने तारा पुर्या पारी तारे चारेमेर जेतुनेन झाड़कान चारेमेर रुपान तसा सुब देसे।
सामळ, जु माणुस यहोवा भगवानेन बीहाणो माने,
तीनाक असीत बरकत जड़से।
यहोवा भगवान तुसेक सीयोन बयड़ान मंदीरेम सी बरकत आपणु चाहजे,
ने तु जलम यरुसलेम सहरेन भलाय देखतु रवसी!
ने तु तारा पुर्यान पुर्या-पारी काजे बी देखसी!
ईस्रायल देसेन माणसे काजे सांती जड़ती रवणु चाहजे!
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.