Bhilali Bible
भजन सहीता 127
भगवानेन भलाय्न गीत
मंदीरेन तीरथ करनेन टेमे गावे चो सुलेमानेन गीत
कदी यहोवा भगवानुत घर नी बणावे,
ती घर बणावण्यान मेहनत फालतु छे।
कदी यहोवा भगवानुत, सहरेन राखवाळी नी करे,
ती राखवाळी करन्या चोवकीदारेन जागणु फालतु छे।
भगवानेन मरजी वीगुर संदारे ऐगात उठणु, ने राती मुड़ा तक सुवणु बी फालतु छे;
असो करीन खाणान बदले काठी कमाय करनु फालतु छे;
बाकुन भगवान ते आपसा लाटेक्ला भग्त काजे जो चाहजे चो आपे,
ने चे बेफीकर्या सुय जाय।
देखु, पुर्या-पारी यहोवा भगवानेन आपला भाग छे,
ने कुखेन फळ ते यहोवा भीणी सी जड़लो ईनाम छे।
जुवानी मां हवे चे पुर्या ते,
डखीन हातेम वाळा बेसका बीलखान तसा काम मां आवे।
बेसकु वारु छे, चु माणुस तेरा बीलखा सांय बेसका पुर्या हय!
तत्यार चु सहरेन बारना अगळ उबु रवसे,
चु वेरी धड़े वात करने नी बीहे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.