Bhilali Bible
भजन सहीता 126
छुटकारा वाटे दुवा
मंदीरेन तीरथ करनेन टेमे गावे चो गीत
आपणु ते सीयोन वाळा छे; जत्यार यहोवा भगवान, आपणुक गुलामी मां सी छुड़ाय लायु,
तत्यार आपणुक असो लाग्यो की, आपणु सपनो देख रया हय।
आपणु ते खुस हय्न हासणे बाजी गुया; ने आपणु खुसीन ने जीतेन गीत गावणे बाजी गुया।
तत्यार राज्य-राज्येन माणसे कवणे बाजी गुया:
“यहोवा भगवान हींद्रे वाटे बेसका मटा काम करलु छे।”
यहोवा भगवान हामरे साते मटा-मटा काम करलु छे;
ने तीनी टेमे हामु बेसका खुस हतला।
ए यहोवा भगवान, जसा दखणाव देसेन मुलुकेम खुदरा छाटात वळी आवे,
तसुत हामरा बचला माणसेक बी गुलामी मां सी छाटुस छुड़ाय लाव।
जे माणसे हंय रड़ता बीज ऐरे,
चे खुसी सी गीत गावता जाय्न काटसे।
भले ऐरने वाळा रड़ता जाय्न बीजेन थयलु हाकलीन बीज ऐरने चाल पड़े,
तेबी चे, खुसीन गीत गावता जाय्न,
मेरेन पुळा हाकलीन आवसे।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.