Bhilali Bible
भजन सहीता 124
यहोवा भगवान आपसा माणसेन राखवाळ्यु
मंदीरेन तीरथ करनेन टेमे गावे चो दावुदेन गीत
ईस्रायली माणसे जो कवे, की कदी,
हामरे भीणी यहोवा भगवान नी रवतु!
कदी यहोवा भगवान तीनी टेमे हामरे भीणी नी रवतु,
जत्यार माणसे हामरे पर लड़ाय करने हुबा हंय जाता।
ती चे हामु काजे तीनीत टेमे जीवतेला गीळ जाता,
जत्यार चे हामरे पर रीसवाय गुयला।
ने हामु तीनीत टेमे पाणी मां डुबी जाता,
ने पाणीन आपणे पर सी उहवीन जाती रवतो,
ने तीनीत टेमे आपणु बेसका पाणी मां उहवीन जाती रवता।
बेसकु वारु छे यहोवा भगवान,
जु आपणु काजे तीनु जमेन हात मां पड़ने नी देदु!
जसो चिरलो सीकार्यान जाळेम सी नीकळी जाय,
तसुत आपणु जीव जाळेम सी नीकळी गुयु, जाळ ते फाट गुय ने आपणु बची गुया।
यहोवा भगवानुत आपणी मदत कर रयु,
जु सरग ने धरती उबजाड़्यु।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.