Bhilali Bible
भजन सहीता 119:105
Verse 105 is marked below, with the whole chapter around it. Read from the start
यहोवा भगवानेन नेम-कायदाक
आलेफ
जे यहोवा भगवानेन नेम-कायदान वाटे चालीन जीवे,
चे बेसका बरकतवाळा छे।
काय चे बेसका बरकतवाळा छे, जे भगवानेन हुकुम काजे माने
ने आखा मन सी तीनाक हेरे।
अळतेन चे ते, कुहराय्न काम नी करे,
बाकुन चे भगवानेन वाट्ये चाले।
ए मारा भगवान तु तारी सीकापण हेरे सी आप्यु की,
हामु तारा नेम-कायदा काजे पुरी रीती सी मानजे।
वारु हवतो की मे नेम पाळने मां पाक्कु हंय जाय्स,
ती मार वाटे बेसको वारु रवसे।
तत्यार मे तारा आखा हुकुम पर धीयान दीस,
ने मेसेक लाजे नी पड़ने देय।
मे तारा धरमवाळा नीयावेन बाराम सीक्या करीस,
तत्यार मे तुसेक खरला मन सी बेसकु वारु कय्स।
मे तारा नेम काजे मान्या करीस;
मेसेक जलमकु मां छुड़े।
भगवानेन नेम-कायदा काजे मान्नु।
बेथ
जुवान्यु आपसी जुवानीक कसु काय चुखी राख सके?
तारा बुलेन साहरे चेतीन जीवणे सी चुखी राख।
मे पुरा मन सी तारी सेवा चाकरी करनेन हेर करो;
मेसेक तारा हुकुम सी छेटु मां हवणी देय।
मे तारा बुल काजे मारा मन मां मेकलु छे,
की तारे वीरुद मां पाप नी करो।
ए यहोवा भगवान, तु बरकत वाळु छे;
मेसेक तारा नेम पाळने सीकाड़।
मे तारा मुंहडाम सी नीकळ्ळी आखी नीयावेन वात,
अळी-अळीन देखाड़तु आय रयु।
तारा नेम-कायदा काजे मान्ने मां असु खुस हवो,
जसु काहनुक माणुस धन दवलत सी बेसकु खुस हवे।
मे तारा नेमेन सीकापण पर मन लागाड़ीस;
ने तारी पाळनी पर धीयान दीस।
मे तारा नेमेन मजा लीया करीस,
तारा नेम-कायदा काजे ने तारी सीकापण काजे नी ईसरो।
भगवानेन कायदा मां खुसी
गीमेल
मे तारु चाकर्यु छे, तु मारो भलो कर तत्यार मे जीवतेलु रय्स,
ने तारा बुल पर चालतु रवो।
तारा नेम-कायदान चकराड़नी वात,
समजणे करीन मारा मनेन डुळा उगाड़ दे।
मे ते धरती पर जलम रवण्यु नी हय;
हेरेसी भगवान तारा हुकुम काजे मार अगळ उजेंतो कर।
दाहड़ीन तारा खरला नीयावेन,
हर करी-करीन मारु जीव बेसकु घाबराय रयु।
तु मटाय करन्या काजे लड़ीन डंड आपे;
चे गरा वाळा ते, तारा हुकुम तुड़ीन भटकी गुयला छे।
मे तारी गवाय मानो, मारी नाव-बद्दी छेटी कर,
ने मे तारा नेम-कायदा काजे मान्या करीस।
राज-करन्या माणसे बी भेळा बठीन मारे वीरुद वात करे,
तेबी मे तारु चाकर्यु, तारा नेम पर वीच्यार करतु रवो।
मे ते तारी नेम-कायदान मजा लीया करो;
तीना नेम-कायदान साहरे मेसेक खरले वाटे जाणेन राय जड़े।
भगवानेन कायदा काजे मान्नेन पाक्कु फेसलु।
दालेत
मे धुळा मां पड़लु छे;
तु आपणा बुलेन अनसारे मेसेक जीवाड़।
मे आपणी चाल-चालनेन तुसे धीयान देदु,
ने तु मारी वात मान लेदु; तु मेसेक तारु नेम-कायदु सीकाड़।
तारी सीकापणेन वाट मेसेक बताड़,
तत्यार मे तारा चकराड़न्या बेसका काम पर वीच्यार करीस।
मारु जीवेन नुरपाणी उतरने सी गळी ज्यु;
तु आपणा बुलेन अनसारे मेसेक ताकत आप।
मेसेक लुचायन वाट सी छेटु कर;
ने दया करीन आपणु कायदु मेसक सीकाड़ दे।
मे छाचायन अनसारे चालनेन वाट नेवाड़ लेदलु छे;
मे तारा नेमे भीणी मे मन लागाड़ीन रवो।
ए यहोवा भगवान, मे तारा नेम-कायदा पर चालो;
मारी आस मां तुड़े।
जत्यार तु मारी हिम्मत बड़ावसी,
तत्यार मे तारा हुकुमेन वाट्ये दवड़ीस।
समज वाटे दुवा
ए
ए यहोवा भगवान, मेसेक तारा नेम-कायदान वाट देखाड़;
तत्यार मे हीनाक आखरी लक धरीन रवीस।
मेसेक समज आप, तत्यार मे तारा कायदा काजे धरीन रवीस।
ने पुरे मन सी हेर पर चालीस।
तारा हुकुमेन वाट पर मेसेक चालाड़,
काहाकी मे हेरेसी खुस छे।
मारा मन काजे माल-धन भीणी नी,
बाकुन गवाय भीणी फेरवी दे।
मारा डुळा काजे फालतु चीजे भीणी सी फेरवीन,
तु तारी वाट मां मेसेक जीवाड़।
तारो बुल ज्य तारो बीहाणो मान्ने वाळा वाटे छे,
हीनुक आपणा पावर्या वाटे पुरो कर।
जेरे नाव-बद्दी सी मे बीहो, हीनीक छेटी कर;
काहाकी तारा नेम-कायदा बेसका-वारु छे।
मे तारा हुकुम काजे हर कर रह्यु;
मेसेक नवली जीवाय आप काहाकी तु धरम वाळु छे।
भगवानेन कायदा पर भुरसु।
वाव
ए यहोवा भगवान, तारी दया ने परमेन अनसारे,
ने तारा वायदान बुलेन अनसारे मेसेक छुटकारु आप।
तत्यार मे मारी नाव-बद्दी करने वाळा काजे जपाप आप सकीस;
काहाकी मे तारा वायदान बुल पर भुरसु करो।
मे ते तारा नीयावेन आस कर रयु;
हेरेसी मारा मुंहडाम तारी छाचाय्न नेम-कायदा जलम रवणे देजी।
तत्यार ते मे तारा नेम-कायदाक जलमकु पाळतु रय्स,
ने मरता लगुन चतराये पाळतु रय्स।
ने मे ते तारी सीकापणेन पछळ पड़ रयु;
तेरेमां मे मकळु हय्न सेटलेत ठीया भीणी चालतु रय्स।
राजा अगळ बी, मे तारी गवाय देखाड़ीस।
ने तारी गवाय देखाड़ने ईतरुक बी, नी लाजवायो।
छाचलीन तारा हुकुम मार वाटे लाटेक्ला छे,
ने मे तार सी परम करो।
मे तारा हुकुमेन मजा लीया करीस। तेरेमां तारा नेम-कायदान किताप अबराम हात उचा करसे;
ने तीनु नेम-कायदान बारामां वीच्यार करतु रय्स।
भगवानेन कायदा मां भुरसु
ए यहोवा भगवान, मे तारु चाकर्यु छे। तु जु वायदु मार साते करलु छे,
चु वायदु हेर कर; तु ते तीना वायदान साहरेत मेसेक आस आपलु।
तु आपसा वायदान बुलेन साहरे मेसेक जीवाड़ रयु। मारी दुखेन टेमे,
तारा वायदान साहरेत मेसेक सांती जड़े।
मटाय करन्या माणसे, मारी बेसकी हासी उडाड़्या;
तेबी, मे तारा नेम-कायदाक पाळनु नी छुड़्यु।
ए यहोवा भगवान, मे तारा पेहला नेम काजे हेर करीन सांती हात कर्यु।
चे मटाय करन्या कुहर्या माणसे, तारा नेम-कायदाक छुड़ी देदा;
हेरेसी मे रीसवाय पड़्यु।
मारा ईना थुड़ाक दाहड़ान जीवाय मां,
मे तारा नेम-कायदान बारामां गीत लिखो।
ए यहोवा भगवान, मे तारा नेम-कायदा पाळनेन कर्या करो।
राती-राती बी तुसेक नावलीया करो।
मे तारा हुकुम काजे मान्ने मां मेसेक खुसी जड़े।
भगवानेन नेम-कायदाक पाळनेन काळजी करे
खेथ
ए यहोवा भगवान, तुत मारु वाटु छे;
मे ते तार अगळ तारी वात मान्नेन वायदु करलु छे।
मे आखा मन सी तुसेक मनाड़्यु;
हेरसी तारा बुलेन अनसारे मार पर बेसकी दया कर।
मे आपणी चाल-चालन काजे वीच्यार्यु,
ने तारा हुकुमेन वाट लेदु।
मे तारा हुकुम काजे मान्ने मां वार नी लागाड़्यु,
बाकुन काळजी करलु छे।
कुहर्या, दांवा लीन मेसेक च्यारे-मेर घेरी लेदला छे।
तेबी मे तारा कायदा काजे नी ईसर्यु।
मे तारा धरम-भर्या नेमेन वजे सी,
आदी राती बी उठीन तुसे काजे बेसकु वारु कह्वो।
जतरा बी तारो बीहाणो माने ने तारी सीकापण पर चाले,
तीनु आखान मे दुस्तीदार छे।
ए मालीक, आखी कळी पर तारी दया करलो परम छावायलो छे;
मेसेक वीद्या वारु रीते सीकाड़।
भगवानेन कायदान कीमत
टेथ
ए मालीक, तु आपणा बुलेन अनसारे
आपणा पावर साते भलाय करलु छे।
मे ते तारा हुकुम पर भुरसु कर्यु,
हेरसी मेसेक वारलु सान-सक्ती ने अक्कल आप।
हेरसी पेहेल की मे दुखी हयु, मे भटकतेलु;
बाकुन हंय मे तारा बुल काजे मानो।
तु भुळु ने भलास्यु बी छे!
मेसेक तारा नेम-कायदा सीकाड़।
मटाय करन्या मारे वीरुद मां लुचाय्न वात कर्या,
बाकुन मे सीकापण काजे पुरे मन सी धरीन रवीस।
हींद्रा मन मटा हंय गुया,
बाकुन मे तारा नेम-कायदान वजे सी सुकी छे।
मारे पर दुख हयो चो मारे वाटे वारुत हयो,
जेरेसी मे तारा नेम-कायदा काजे सीक सको।
तारु आपलु नेम-कायदु मारे वाटे हजारु रुप्या,
ने भारे भार सना-चांदी सी बी खास कीमती छे।
भगवानेन कायदान नीयाव
योध
तारे हाते सी मे बणायु ने घड़ाय गुयु;
मेसेक समज आप की मे तारा हुकुम काजे सीको।
तारो बीहाणो मानन्या मेसेक देखीन खुस हवसे,
काहाकी मे तारा बुल पर आस लागाड़लु छे।
ए यहोवा भगवान, मे जाण गुयु की, तारा नीयाव धरमभर्या छे,
ने तु, तारी खराय्न अनसारेत मारे पर दुख आवणे देदलु छे।
मे ते तारु पावर्यु छे; तारा वायदान अनसारे,
तारी परेमेन अनसारेत मेसेक सांती आप।
तारी दया मारे पर हवे, तत्यार मे जीवतेलु रवीस;
काहाकी मे तारा कायदा सी सुकी छे।
जे मटाय करन्या माणसे मार पर झुटु गुनु लागाड़े चे लाजवाय जाणु चाहजे;
बाकुन मे ते, तारा सीकापण पर वीच्यार कर्या करीस।
जे तारी बीहाणो माने, चे मारे भीणी फीरे,
तत्यार चे तारी गवाय काजे समजी लेसे।
मारो मन तारी हुकुम काजे मान्ने मां नी-गुनाळो रवे,
असो नी हवे की मेसेक सरमायणु पड़े।
छुटकारा वाटे दुवा
काफ
ए यहोवा भगवान मारु जीव तारा छुटकारा वाटे कांदराय आवे;
मे तारा बुल पर भुरसु राखो।
मारा डुळा तारा बुलेन पुरो हवणेन वाट देखी-देखीन धुंधळी पड़ गुय;
ने मे कह्वो की तु मेसेक कत्यार सांती आपसी?
काहाकी मे चामड़ान बन्ली सीसी मां दारुन तसु बेकार हंय गुयु;
तेबी तारा हुकुम काजे नी ईसर्यु।
तारा पावर्यान कतरा दाहड़ा रय गुया?
तु मारे पछळ पड़न्या काजे डंड कत्यार आपसी?
चे मटाय करन्या माणसे ते तारा नेम-कायदान अनसारे नी जीवे,
चे मारे वाटे खाडु खुंद्या।
तारा आखा हुकुम भुरसा लायक छे;
चे माणसे झुट बुलता जाय्न मारे पछळ पड़ र्या; तु मारी मदत कर।
चे मेसेक धरती पर सी सार नाखणे हींडतेला,
तेबी मे तारा हुकुम काजे नी छुड़्यु।
तारी दया ने परमेन अनसारे मेसेक काजे जीवतेलु राख।
तत्यार मे तारा मुंहडान नेम-कायदा पर चालीस।
मालीकेन कायदा मां भुरसु
लामेध
ए मालीक, तारु बुल, ते सरग मां;
जलम टेकलु रवे।
तारी खराय पीड़ी-डीट बणीन रवे;
तु धरती काजे उबजाड़ीन मेक रह्यु, हेरसी ची टेकली रवे।
चे आजुन दाहड़ा लक तारा नेमेन अनसारे ठेहरे;
काहाकी चे आखा तारा पावर्या छे।
कदी मे तारा कायदा सी सुकी नी हवतु,
ती मे दुखेन टेमे खत्तम हंय जातु।
मे तारी सीकापण कदी नी ईसरो;
काहाकी तेरेत साहरे, तु मेसेक आज लक जीवाड़ रह्यु।
मे तारुत छे, तु मेसेक बचाड़ ले!
काहाकी मे, तारी सीकापणेन देख-भाळ करो।
कुहर्या मेसेक मारने करीन डुकाय रया;
तेबी मे तारी गवाय्न बुल पर मन लागाड़ो।
मे देख्यु की, माणसेन हुनरे घड़ायली आखी चीजेन छेव छे;
बाकुन तारा हुकुमेन छेव नी हय, हेरसी मटु छे।
भगवानेन कायदान लागाव परम
मीम
मालीक, मे तारा कायदा सी कसु परम राखो।
आखु दाहड़ु भरीन मारु हेर हेरेत पर लागलु रवे।
तारु हुकुम सदा मारे पुठे रवे,
ने मेसेक मारा वेरी अदुस अकलवाळु बणावे।
मे मारा मासतर्या सी बी वदु समज राखो;
काहाकी मारो मन तारी गवाय पर लागलो रवे।
मे ते तारी सीकापण मानीन पाळो;
हेरसी मे डाहला पुडार्या सी बी वदु समजदार छे।
जतरी बी बुराय्न वाट छे, तीने वाट्ये मे नी जाम;
काहाकी मेसेक तारा बुलेन अनसारे चालनु छे।
तुत मेसेक सीकाड़लु छे;
हेरसी मे तारा नेम भीणी सी अथु नी हयु।
तारा बुले मेसेक गुळ्या लागे,
माहाळ सी बी जादा गुळ्या लागे!
तारी सीकापणेन वजे सी मेसेक समज जड़े;
हेरसी मे आखी लुच्ची वाटे सी छीट राखो।
भगवानेन कायदान वीजाळो
नुन
तारो बुल, मारा पाये वाटे दीवु,
ने मारे वाट्ये वीजाळो छे।
मे सगुन खादु, ने नखी कर लेदु,
की मे तारा धरमेन नेम-कायदान अनसारे चालीस।
ए यहोवा भगवान मे बेसकु दुख मां पड़ रयु;
तारा बुलेन अनसारे मेसेक जीवतेलु राख।
मार मुंहडे गावण्या तारा गुण मान ले जे बादा साय छे,
ने तारा नेम-कायदा मेसेक सीकाड़।
मे मारु जीव हेतळा पर लीन फीर्या करो,
तेबी मे तारा नेम-कायदा काजे नी ईसर्यु।
कुहर्या माणसे मारे वाटे फांद मेल रह्या।
बाकुन मे तारी सीकापणेन वाट्ये सी नी भटक्यु।
मे तारा नेम-कायदा काजे जलम वाटे आपणु खुदेन भाग कर लेदु,
काहाकी चे मारा मनेन खुसीन वजे छे।
मे मारा मन काजे हेनी वात पर लागाड़ रह्यु,
की आकरी लक तारा नेम-कायदा पर जलम चालतु रवो।
भगवानेन कायदा मां बचाड़
सामेख
मे, दुय-मन्या माणसे भीणी छीट राखो,
बाकुन तारु नेम-कायदु मेसेक बेसकु वारु गमे।
तु मारु राखवाळ्यु ने बचाड़न्यु छे,
मे तारा वायदा पर आस राखो।
ए पापी माणसे, मारे सी छेटा हंय जावु,
की मे मारा भगवानेन हुकुम काजे मानीस।
ए यहोवा भगवान, आपणा बुलेन अनसारे मेसेक समाळ,
की मे जीवतेलु रह्वो, ने मारी आस काजे मां तुड़े।
मारी राखवाळी कर, तत्यार मे बची रह्वो,
ने एकदम तारी नेम-कायदा भीणी धीयान लागाड़ो।
जतरा तारी नेम-कायदा वाट सी भटकी जाय, हेनु आखा काजे तु नीकारु कर देय,
काहाकी हींद्री चतराय झुटी छे।
तु, धरतीन आखा कुहर्या माणसे काजे, कचरान तसु समजे।
हेरसी मे तारी सीकापण सी परम करो।
तारा बीहाणा सी मारो डील कापे,
ने मे तारा नेम-कायदा सी बीह्यो।
भगवानेन नेम-कायदा काजे मान्नु
ऐन
मे ते तारा नीयावेन ने धरमेन काम करलु छे;
तु मेसेक वेला पाड़न्यान हातेम मां छुड़े।
तारा पावर्यान भलाय वाटे मार साते मदत कर।
मटाय करन्या काजे मारो नुकसाण मां करने देय।
मारा डुळा तारे सी छुटकारु हात करने करीन,
ने तारा धरम-भर्या बुलेन पुरो हवणेन वाट देखता-देखता धुंदळा पड़ गुया।
तारा पावर्या साते परेमेन अनसारे वेहवार कर;
ने तारी नेम-कायदा मेसेक सीकाड़।
मे ते तारु पावर्यु छे, तु मेसेक समज आप;
हेरेन करीन की, मे तारा नेम-कायदा काजे सीखो।
ची टेम आवली छे, की यहोवा भगवान काम करे,
काहाकी माणसे तारा नेम-कायदा काजे तुड़ नाख्या।
हेरे वजे सी मे तारा हुकुम काजे सना सी बी,
चुखला सना सी बी वारु गमे।
हेरसी मे तारी आखी सीकापण काजे आखा बारामां संय जाणो;
ने आखी झुटी वाट्ये सी छीट राखो।
भगवानेन कायदा पर चालनेन हर
पे
तारी सीकापण चकराड़े असी छे;
हेरे वजे सी मे हीनुक आपणा मन सी लागाड़लु छे।
तारु बुल देखाड़ने ने साहरे देखणे-समजणेन वीजाळो जड़े;
हेरसी भुळा माणसे काजे समज जड़े।
काहाकी मे तारा हुकुमेन पीसलु हतलु।
मे तारा हुकुम वाटे हसो-हसो करने लाग्यु,
जसी तारी रीती तारा नावेन परम राखणे वाळा मां सी छे,
असीत मारे भीणी बी फीरीन मार पर दया कर।
तु तारा वायदान अनसारे मारा पाये काजे आपणा बुलेन वाट पर काठु कर,
ने काहालीक फालतु वात काजे मारे पर हक मां जमाड़नी देय।
मेसेक माणसेन दमण-दुखण सी छुड़ाय ले;
तत्यार मे तारी सीकापण काजे मानीस।
तारा पावर्या पर तारा मुंहडान वीजाळो भबळाय दे,
ने मेसेक तारा नेम-कायदा सीकाड़।
मेसेक दमण्या ते, तारा नेम-कायदाक नी मानता;
हेरसी मे बेसकु उसकी-उसकीन ने कल्पी-कल्पीन रड़्या करो।
भगवानेन कायदान नीयाव
सांदे
ए यहोवा भगवान, तु धरमी छे;
ने तारु नेम-कायदा सुदला छे।
तु तारा नेम-कायदा काजे धरम,
ने आखी खराय सी कह्यु।
मारी रीस आक्ठान तसी धप रय,
काहाकी मारा वेरी ते, तारा बुल काजे ईसरी गुया;
तारु बुल ते पुरी रीत सी पाक्को छे;
हेरसी तारु पावर्यु, परम करे।
मे नानु ने नेचु छे,
तेबी मे तारी सीकापण नी ईसर्यु।
तारा धरम, जलमेन धरम छे,
ने तारु नेम-कायदु सदा छाचलु छे।
मे फीकुर ने गरा मां फसलु छे,
बाकुन मे तारा हुकुम सी सुकी छे।
तारी नेम-कायदा जलम धरम-भराय छे;
तु मेसेक काजे समज आप; की मे जीवतेलु रवो।
छुटकारा वाटे दुवा
काफ
मे आखे मन सी तारे भीणी दुवा करलु छे;
ए मालीक मारी सामळी लेजी मे तारी वीद्या काजे धरीन रवीस।
मे तारे भीणी दुवा करलु छे;
तु मेसेक बचाड़ ले, ने मे तारा नेम-कायदा काजे मान्या करीस।
दाहड़ु उंगणे सी पेहेल मे तुसेक मदत वाटे आयड़ो,
मारी आस तारा बुल पर छे।
एक-एक पहर वीतणेन पेहेल मे जाग जाम,
की मे तारा बुल पर हेर करो।
तारी दया करला परमेन अनसारे मारी सामळी ले;
ए यहोवा भगवान, तारी रीतेन अनसारे मेसेक जीवतेलु राख।
जे कुहर्या माणसे, पापेन धुन मां रवे, चे धड़े आय ज्या;
चे तारा कायदा सी छेटा हंय ज्या।
ए यहोवा भगवान, तु ते मारे धड़े छे।
ने तारा आखा हुकुम छाचला छे।
बेसकी टेम सी मे तारा नेम-कायदा काजे जाणो,
की तु हींद्रो नेवु जलम वाटे नाखलु छे।
मदतेन मांग
रेस
मारा दुख काजे देखीन मेसेक छुड़ाय ले,
काहाकी मे तारा नेम-कायदा काजे नी ईसर्यु।
मारी तारीक लड़, ने मेसेक छुड़ाय ले;
तारा बुलेन अनसारे मेसेक काजे जीन्दु।
कुहर्या काजे छुटकारु जड़नु काठो छे,
काहाकी चे तारी नेम-कायदान खबर नी राखे।
ए यहोवा भगवान, तारी दया ते मटी छे;
हेरेसी आपणा नेम-कायदान अनसारे मेसेक बचाड़ ले।
मारे पछळ पड़न्या ने मारी बुराय करने वाळा बेसका छे,
बाकुन मे तारा नेम-कायदा सी छेटे नी हयु।
ने धुकु देण्या ते तारी वात नी मान्ता,
तेरेमां मे धुकु देण्याक देखीन तींद्रे पर रीस करो।
मेसेक देख मे तारा नेम-कायदा सी परम राखो।
ए यहोवा भगवान, तारी दया ने परमेन अनसारे मेसेक जीवतेलु राख।
तारो बुल छाचलो छे;
ने तारो एक-एक धरम-भर्या नेम-कायदा जलम काळ लक बन्लो छे।
भगवानेन कायदा लीये हक मां हवणु।
पुडार्या फालतु मारे पछळ पड़ र्या,
बाकुन मारो मन तारे बुलेन बीहाणो माने असो छे।
जसु कुय बेसका धन काजे लुटीन खुस हवे,
तसुत मे तारा कवला बुलेन वजे सी खुस छे।
झुट सी ते मे खर ने घीण राखो,
बाकुन तारा नेम-कायदा सी परम करो।
तारा धरम-भर्या नेम-कायदान वजे सी,
मे एक दाहड़ा मां सात कावा तारी बड़ाय करो।
तारा नेम-कायदा सी परम राखणे वाळा काजे बेसकी मटी सांती जड़े;
ने हीनुक काय बी ठुकर नी लागे।
ए यहोवा भगवान, मे तारे सी छुटकारान आस कर रयु,
ने तारा हुकुम पर चालतु आयु।
मे तारा नेम-कायदा काजे मान्या करो,
ने हींद्रे सी बेसकु परम राखतु आय रयु।
मे तारा सीकापण ने हुकुम काजे मानतु आयु,
काहाकी मारो आखो उठणु-बठणु तार अगळ उजेंतो छे।
मदत वाटे दुवा
ताव
ए यहोवा भगवान, मारी लीलघाय सामळी ले;
तु तारा बुलेन अनसारे मेसेक समज आप।
मारो लीलघायणु तारेन्चा पुगणु चाहाजे,
तु तारा बुलेन अनसारे मेसेक छुड़ाय ले।
मारा मुंहडा सी बड़ाय करतु रवो,
काहाकी तु मेसेक तारा नेम-कायदा सीखाड़े।
मे तारा बुलेन गीत गावीस,
काहाकी तारा आखा हुकुम धरम-भर्या छे।
तारा हात मारी मदत करने करीन तीयार रवे,
काहाकी मे तारी सीकापण काजे मान्यु।
ए यहोवा भगवान, मे तार सी छुटकारु हात करनेन लालच करो,
मे तारा नेम-कायदा सी सुकी छे।
मेसेक जीवाड़, ने मे तारी बड़ाय करीस,
तारा नेम-कायदा सी मारी मदत हवे।
मे खुवायला गाडरान तसु भटकी रह्यु;
तु तारा पावर्या काजे हेर ले,
काहाकी मे तारा हुकुम काजे नी ईसरो।
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.