Bhilali Bible
भजन सहीता 118
जीत वाटे बेसकु वारु कवणु
यहोवा भगवान काजे बेसकु वारु कह्वु, काहाकी चु भलास्यु छे;
ने तेरी दया ने परम जलमकी छे।1
ईस्रायली माणसे असा कह्वे,
तेरी दया जलमकी छे।
हारुनेन घराणो बी असो कवणु चाहजे,
हेरी दया जलमकी छे।
यहोवा भगवानेन बीहाणो मान्या,
असा कह्वे हेरी दया जलमकी छे।
मे काठला दाहड़ा मां, यहोवा भगवान धड़े दुवा कर्यु, ती यहोवा भगवान मारी सामळीन,
मेसेक मटला जागा मां पुगाड़्यु।
यहोवा भगवान मार भीणी छे, मे नी बीहो।
माणसे मारो काय बीगाड़ लेसे?2
यहोवा भगवान मार भीणी मारु सात-देण्यु छे;
हेरेसी मे मारा वेरीक जीततु रय्स।
यहोवा भगवान पर भुरसु करने,
माणसे पर भुरसु करने सी बेसको वारु छे।
यहोवा भगवानेन आसरु लेणु,
हक जमाड़न्या पुडार्या पर भुरसु करने सी बेसको-वारु छे।
आखा राजेन माणसे, मेसेक खत्तम करने करीन घेरवी लेदा,
बाकुन यहोवा भगवानेन नाव सी, मे पाक्कु हीनुक खत्तम कर नाखीस।
चे मेसेक घेरवी लेदा,
बाकुन यहोवा भगवानेन नाव सी, मे पाक्कु तीनुक खत्तम कर नाखीस।
चे मेसेक भवारेन मखड़ान तसा घेर लेदा;
बाकुन चे काटान तसा धपीन तत्यारुत उल्वाय गुया;
यहोवा भगवानेन नाव सी, मे पाक्कु तीनुक खत्तम कर नाखीस।
ए जम, तु मेसेक पाड़ने करीन बेसकु जुर्ये धकल्यु,
बाकुन यहोवा भगवान मारी मदत कर्यु।
यहोवा भगवानुत मारु जुर ने मारा गीतेन झर छे;
चु मेसेक छुटकारु करलु छे।3
धरमीन तम्बु मां जीतेन ने छुटकारान गीते सामळाय रया;
यहोवा भगवानेन जेवड़्यु हात ताकत वाळा काम कर रयु;
यहोवा भगवानेन जेवड़्यु उचु हयु।
यहोवा भगवान ताकत वाळा काम करन्यु छे।
मे हंय मरो नी, बाकुन जीवतेलु रय्स,
ने यहोवा भगवानेन कामेन बारामां माणसे काजे कह्या करीस।
यहोवा भगवान मेसेक डंड ते आप्यु;
बाकुन मेसेक मुतेन हात मां नी कर्यु।
मार वाटे धरमेन बारनो उगाड़ देवु मे,
तीनु बारना माय्न भराय्न यहोवा काजे बेसकु वारु कय्स।
यहोवा भगवानेन बारनो जत छे,
हेरे मां धरमी माणसे अतरात भरायसे।
ए यहोवा भगवान, मे तुसेत काजे बेसकु वारु कह्वो, काहाकी तु मारी सामळी लेदलु छे,
ने मेसेक छुटकारु आपलु छे।
तीना दगड़ा काजे मीसतर्या फालतु समजीन बाहार नीकाळ देदा,
चु खुणे वाळु दगड़ु बण गुयु।4
जो ते यहोवा भगवान भीणी सी हयो,
जो आपणी नींगा मां चकराड़े असो बेसको कायनी छे।5
आजुन दाहड़ु ते यहोवा भगवान बणावलु छे;
हामु हेरेमां खुस ने मुजा मां रवजे।
ए यहोवा भगवान हामरो, लीलघायणु सामळ, छुटकारु कर!
ए यहोवा भगवान, लीलघायणो सामळ, छुटकारु दे!6
चु राजु जु यहोवा भगवानेन नाव सी आवे, चु बरकतवाळु छे,
हामु तुहुंं काजे यहोवा भगवानेन घरेम सी संयबरकत आपजे।7
यहोवा भगवानुत आपणु भगवान छे,
ने हयु हामु काजे वीजाळो आप्यु।
बादा वाटे छुल्ला जनवार काजे वेदीन सींगड़ा दुयड़ा सी बांद्यु।
ए यहोवा भगवान, तु मारु भगवान छे, मे तुसेक बेसकु वारु कय्स;
तुत मारु भगवान छे, मे तारात गुण गावो।
यहोवा भगवान काजे बेसकु वारु कह्वो, काहाकी चु भलास्यु छे।
ने तेरी दया जलमकी बणीन रवे!
Source notes (7)
- Cross-reference 1 ईतीहास 16:34; 2 ईतीहास 5:13; 7:3; एज्रा 3:11; भजन सहीता 100:5; 106:1; 107:1; 136:1; यीरम्या 33:11
- Cross-reference ईब्रानीयो 13:6
- Cross-reference नीरगमन 15:2; यसाया 12:2
- Cross-reference लुका 20:17; नेवताळान काम 4:11; 1 पतरस 2:7
- Cross-reference मत्ती 21:42; मरकुस 12:10,11
- Cross-reference मत्ती 21:9; मरकुस 11:9; युहन्ना 12:13
- Cross-reference मत्ती 21:9; 23:39; मरकुस 11:9; लुका 13:35; 19:38; युहन्ना 12:13
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.