Bhilali Bible
भजन सहीता 115
एकुत छाचलु भगवान छे
ए यहोवा भगवान, हामरु नी, हामरु नी, बाकुन तारेत नावेन बड़ाय हवे,
दीसरा माणसे अगळ उजेंतु कर, असो करनु ती तारी दया,
परम ने खराय्न साहरे वारु छे।
आखा राज्येन माणसे काहा कह्वणु चाहजे की,
हींद्रु भगवान कां छे?
हामरु भगवान ते सरग मां रवे;
चु ते आपसाक जो चाहजे चोन करे।
बाकुन हीनु मुरत्याक चे पुजे,
चे मुरत्या ते माणसेन हातेन बणावला छे।
हींद्रो मुहंडो ते रवे, बाकुन चे बुली नी सके;
हींद्रा डुळा ते रवे, बाकुन चे देखी नी सके।
हींद्रा कांटा ते रवे, बाकुन चे सामळी नी सके;
हींद्रो नाक ते रवे, बाकुन चे सुंगी नी सके,
तीनु मुर्यान हात ते रवे; बाकुन चे छीमी नी सके;
हींद्रा पाय ते रवे, बाकुन तीनुक छीमाये नी, तीनु मुरत्यान पाय ते रवे बाकुन तीनुक चालाये नी;
ती चे मुरत्या काय बी बुली नी सके।
मुरती बणावणे वाळा बी मुरतीन तसा हंय जासे,
ने मुरत्या पर आखा भुरसु करने वाळा बी मुरत्यान तसा हंय जासे।1
ए ईस्रायली माणसे, यहोवा भगवान पर भुरसु करु,
काहाकी तारु मदत करन्यु ने आडु आवण्यु हयुत छे।
ए हारुनेन घराणा, यहोवा भगवान पर भुरसु करु,
तारु मदत करन्यु ने आडु आवण्यु हयुत छे।
ए यहोवा भगवानेन बीहाणो मानन्या, यहोवा भगवान पर भुरसु करु,
तारु मदत करन्यु ने आडु आवण्यु हयुत छे।
यहोवा भगवान आपणु काजे फीकुर करलु छे; चु संयबरकत आपसे।
चु ईस्रायलेन घराणाक संयबरकत आपसे;
चु हारुनेन घराणाक संयबरकत आपसे।
यहोवा भगवान तेरो बीहाणो मान्याक संयबरकत आपसे,
चु नाना मटा आखा काजे बरकत आपसे।2
यहोवा भगवान तुहुंक,
ने तुंद्रा पुर्या-पारीक बी अदुस बड़ावसे
सरग ने धरती काजे यहोवा भगवान बणावण्यु छे,
तेरे भीणी सी तुहुंं संयबरकत हात करला छे।
सरग ते यहोवा भगवानेन छे, बाकुन धरती काजे ते,
चु माणसेन हक मां करलु छे।
मरला माणसेन धड़ ते हुगा रय्न पड़ रवे।
चे ते यहोवा भगवानेन बड़ाय नी कर सके।
बाकुन हामु ते हंय सी जलम लग,
यहोवा भगवानेन बड़ाय करता रवसुन।
यहोवा भगवानेन बड़ाय करु!
Source notes (2)
- Cross-reference भजन सहीता 135:15-18; उजेंता बुले 9:20
- Cross-reference उजेंता बुले 11:18; 19:5
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.