Bhilali Bible
भजन सहीता 114
फसह तीहवारेन गीत
जत्यार ईस्रायली माणसे मीस्रे सी,
मतलब याकुबेन घरन्यान दीसरी बुलीवाळा मां सी नीकळी आया।1
तत्यार यहुदा यहोवा भगवानेन चुखली जागा,
ने ईस्रायल तेरा राजेन माणसे हंय गुया।
तीनी टेमे रातलो दरीयो तीनुक देखीन ढास पड़्यो,2
ने यरदन नदी तीनुक देखीण जींखुर सी उहवीन आवतेली तींखुर पछी वळ गुई।3
बयड़ा गाडरान तसा उछळने बाजी गुया,
ने बयड़ा गाडरा-बुकड़ान पीलान तसा गद-गद कुद्या।
ए रात्ला दरीया, तुसेक काय हंय गुयो, की तु ढासी पड़्यु?
ने यरदन नदी, तुसेक काय हयो, की तु हुगी रय गुई?
ए बयड़ा, तुहुं काहा बुकड़ान तसा उछळी रया?
ने ए बयड़्या तुहुं काहा गाडरान तसा उछळ्या?
ए धरती, यहोवा भगवान अगळ,
याकुबेन भगवान अगळ बीह्या कर,
चु चापर्या काजे पाणीन कुंडी,
झीकर्या दगड़ा काजे पाणीन झीर बणाय देय।4
Source notes (4)
- Cross-reference नीरगमन 12:51
- Cross-reference नीरगमन 14:21
- Cross-reference यहोसु 3:16
- Cross-reference नीरगमन 17:1-7; गिन्ती 20:2-13
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.