Bhilali Bible
भजन सहीता 116
मुत सी बचणे पर भगवान काजे बेसकु वारु कवणु
मे यहोवा भगवान सी परम करो,
काहाकी चु मारा लीलघायणा काजे सामळ्या करे।
मे जीवीस ती लग भगवान धड़े दुवा कर्या करीस,
काहाकी चु मारी दुवा मन लागाड़ीन सामळी रयु।
मेसेक वेला ने हीड़ा-पीड़ा झेलनु पड़्यो;
मुतेन दांवा मेसेक च्यारुमेर घेरवी लेदलो;
ने पाताळेन बीहाणो मारेम बेसको भराय गुयलो।
तत्यार मे यहोवा भगवान सी दुवा कर्यु,
“ए यहोवा भगवान, लीलघायणु सामळीन मारा जीव काजे बचाड़ ले।”
यहोवा भगवान गीण-दया देखाड़न्यु ने धरमी छे,
आपणु भगवान दयाळु छे।
यहोवा भगवान भुळा माणसेन राखवाळी करन्यु छे;
ने मे ते बेसकु लुलु हंय गुयलु, ती चु मेसेक बचाड़ लेदलु।
ए मारा जीव, तु आपणा आरामेन-जागाम पछु आवती रव;
काहाकी यहोवा भगवान तारो भलो करलु छे।
यहोवा भगवान, तु ते मेसेक मुतेम सी बचाड़्यु,
मारा डुळाक आसळा पड़ने सी बचाड़्यु,
ने पायेक ठेस लागणे सी बचाड़्यु।
जत्यार लगुन मे जीवतेलु रय्स,
तत्यार लगुन यहोवा भगवानेन मरजीन साहरे जीवीस।
मे जो असु कह्यु, हीनाक भुरसान कसाव पर कसीन कह्यु,
“मे ते बेसकु दुखी छे”;1
मे ते उतवाळ मां कह्यु,
“आखा माणसे लुच्चा छे।”
यहोवा भगवान मारो बेसको भलो करलु छे,
तेरी भलाय्न करजु मे कसु करीन छुटो।
मे छुटकारान पीयालु हाकलीन,
यहोवा भगवान सी दुवा करीस,
मे यहोवा भगवान अगळ जी मान्ता लेदलु छे, ची मानता मे,
तेरा आखा माणसे अगळ पुरी करीस।
यहोवा भगवानेन भक्ती-करन्यान मुत ते,
यहोवा भगवान अगळ छाचलीन बेसकी महंगी छे।
ए यहोवा भगवान, तु ते, मारा मोतेन साकळ्या छुड़ देद्लु छे।
मे ते, तारु चाकर्यु छे, छाचलीन मे तारु चाकर्यु छे,
ने तारी पावरनीन पुर्यु छे।
हेरेसी मे यहोवा भगवानेक तु बेसकु वारु कर्यु कवतु जाय्न, तेरे वाटे बादा चहड़ावणु।
मे तीनाक जुर सी नाव लीया करो।
मे यहोवा भगवान अगळ जी मान्ता लेदलु छे, ची मानता मे तेरा आखा माणसे अगळ पुरी करीस।
ने यहोवा भगवानेन मंदीरेन आंगणा मां, जां यरुसलेम सहरेन ईचमां, मानता छुड़ीस।
हालेलुया कय्न यहोवा
भगवानेन बड़ाय करु।
Source notes (1)
- Cross-reference 2 कुरींथी 4:13
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.