Bhilali Bible
उबजाणनी किताप 45
युसुफ खुदेन बारामां आपसान भायस काजे देखाड़े
यहुदान वात सामळीन युसुफेन काठु-जीव नी हयु, ने चु उतवाळ्युत आखा पावर्या काजे आयड़ीन कह्यु “जां सी खयड़े जाती रव।” आखा खयड़े जाती रया ने अळतेन युसुफ आपसा वाराम आपसा भाय अगळ कय देदु। तीने टेमे युसुफ पुठ्ये तेरा भायसेक छुड़ीन कुय नी हतलो। ने चु ढळो-ढळो रड़ने बाजी ज्यु, ने खयड़े वाळा मीसर देसेन माणसे युसुफ काजे रड़तेलु सामळी लेदा, ने तेरा रड़नेन खबर फीरोन राजान चां ने तेरा घरन्यान चां पुगाड़ देदा। ती युसुफ आपसा भाय काजे कह्यु, “मे तुंद्रु भायस युसुफ छे, मारु बास हंय लग जीवतेलु छे काय?” युसुफेन वात सामळीन चे घाबराय गुयला, तेरेमां चे युसुफ काजे काय बी जपाप नी देदा। अळतेन युसुफ आपसा भाय काजे अळी कह्यु, “मारे साते आवु।” ज सामळीन चे युसुफ साते गुया। ने युसुफ तीनुक कह्यु, “मे तुंद्रु भायस युसुफ छे, ने तुहुंं मेसेक मीसर देसेम जाण्या वेपारी काजे वेच देदला, ने चे मेसेक जां ली आवला। हंय मां घाबरायु। ‘हामु ते ईनाक वेच देदला’ करीन आपसा पर मां कीचवायु; काहाकी भगवान तुहुंंक काळ मां सी बचाड़ने करीन, पेहेल सीत मेसेक जां मकेल्लु छे। काळ पल्लु दुयुत साल हय र्या; ने पांच साल अळी काळ पड़से, काळेन ईनु साले मां कुय खेते मां हळ बी नी जुपे, ने बीज बी नी वेरे ने फसल बी नी काटे। तेरेमां भगवान मेसेक तुंद्रे सी पेहेल जां सी मकली देदलु, काहाकी तुहुंं धरती पर जीवतेला रहु, ने तुंद्रु वेल अधे करीन ने तुंद्री अवल्यात बची जाय करीन। जां भगवान मेसे काजे फीरोन राजान बासेन तसु, ने तेरा घरेन मुखी, ने आखा मीसर देसेन मालीक बणाय देदलु छे।”
युसुफ अळी कह्यु, “ने तुहुंं उतवाळ्यात मारा बासेन चां जावु, ने तीना काजे कहु तारु पुर्यु युसुफ असु कय मकेल्लु छे की, भगवान मेसे काजे मीसर देसेन मालीक बणाय देदलु छे; तेरेमां तु छाटुत मारेन चां आवती रव। ने तु मार धड़े गोसेन मुलुक मां तारा पुर्या भेळे, ने पुर्यान-पुर्या भेळे, ने गाडरा बुकड़ा भेळे ने आपसा आखा माणसे भेळे रवजी। ने पांच साल लग अळी काळ पड़से, ती तीना काळ मां मे तुंद्री देख-भाळ कर्या करीस; ने तु ने तारा घरन्या, ने जतरा बी तारे भेळा छे, चे भुकला नी मरे।”
युसुफ आपसा भाय काजे कवतुत गुयु की, “हंय तुहुंं ने तुंद्रु भायस बीन्यामीन उजेंता देख लेदला छे की, मे छाचलीन युसुफ छे। ने तुहुंं मीसर मां जो काय मटा कामे देखला छे, तेरे वाराम मारा बास काजे देखाड़ देजु; ने मारा बास काजे जां छाटात लीन आवजु।”
असु कय दीन युसुफ बीन्यामीन काजे बाथलाटीन रड़ने बाजी ज्यु; ने बीन्यामीन बी युसुफ काजे बाथलाटीन रड़ने बाजी ज्यु। अळतेन युसुफ रड़तु जाय्न आखा भाय काजे गुळु देदु ने तीनुक बाथलाटीन रड़्यु: ने अळतेन तेरा भायस तेरे साते वात करने बाजी ज्या।
युसुफेन भायस युसुफेन चां आय र्या, करीन राजान हवेली मां खबर पुगी, ती फीरोन राजु ने तेरा पावर्या खुस हय ज्या। ने फीरोन राजु युसुफ काजे कह्यु, “तारा भाय काजे कव की, तुहुंं काजे जतरो बी अन चाहजे, ततरो दाणा गदड़ा पर झेलाड़ीन कनान देस मां पछा जाती रहु। ने तुंद्रा बास काजे ने तुंद्रा घरन्या काजे जां ली आवु; ने मीसर देस मां जो काय छे, तेरेम सी आखान वारलु तीनुक आपीस, ने देसेम वाळो आखाम वारलु खाणो खाणे आपीस।” फीरोन राजु, युसुफ काजे असो बी कह्यु, “तु, तीनुक कव की, तुहुंं तुंद्रा बायरा-छुरा काजे जां लावणे करीन मीसर देसेम सी थुड़ाक घुड़ा-गाडी ली जावु, ने आपसा बास काजे बी बठाड़ीन ली आवु। ने चां वाळी चीजेन फीकुर घुण करु; काहाकी तुहुंं काजे मीसर देसेम वाळी वारलु सी बी वारलु चीज जड़ जासे।”
युसुफ फीरोन राजान वात सामळीन आपसा भायसेक देखाड़्यु, ने चे हव, कय देदा। ने युसुफ, राजान कहणेन अनसारे तीनुक घुड़ा-गाडी आप्यु ने वाट्ये खाणे करीन खाणेन चीज बी आप्यु। आखा भायस काजे युसुफ एकेक जुड़ी नवला पुथल्या बी आप्यु; बाकुन बीन्यामीन काजे तीन सव चांदीन टका ने पांच जुड़ी नवला पुथल्या आप्यु। युसुफ आपसा बास वाटे दस गदड़ा पर, मीसर देसेन वारली चीजेन दस गाठड़ा, ने कनान देसेम सी मीसर देसेम आवणी वेळाय वाट्ये खाणे करीन खाणो, रुटा ने दीसरो भात्यो खाणो दस गदड़ी पर झेलाड़ देदु। असु करीन युसुफ आपसा भाय काजे जो आखो आपीन वळाय देदु, ने चे चाल पड़्या; ती चु तीनुक कह्यु, “वाट्ये घुण लड़ायता।”
असु करीन चे मीसर देस सी चाल पड़्या ने कनान देस मां आपसा बास याकुबेन चां जाती र्या। ने घर पुगतात चे आपसा बासेक कह्या, “युसुफ ते हय लग जीवतेलु छे, ने मीसर देसेम राज-करन्यु मुखी बण र्यु।” जी वात सामळीन तींद्रा बास याकुबेन भळ-जीव कर्यु, ने चु ईनी वाते पर भुरसु नी कर्यु।
बाकुन युसुफ कहलु ची आखी वात चे आपसा बास याकुब काजे कय देदा ने याकुब तीनु घुड़ा-गाडी काजे बी देख्यु, जे घुड़ा-गाडी युसुफ तीनाक लेणे करीन मकेल्लु। ती याकुबेन जीव फवरु हय गुयु। अळतेन इस्राएल्यु कह्यु, “हंय मेसेक भुरसु छे की, मारु पुर्यु युसुफ हय लग जीवतेलु छे, मारे वाटे अतरोत बेसको, मे ते मरनेन पेहलुत जाय्न तीनाक देख लीस।”
Bhilali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.